Түске дейін кезек: Алматыда автобус жүргізушілері газ құю бекеттерінің аздығына наразы

Алматыда автобус жүргізушілері қалада екі-ақ газ құю бекеті жұмыс істеп тұрғанын айтып шағымданды. Таңғы 5-тен бастап 5-6 сағат кезекте тұратындар «бізді аялдамада сағаттап күтетін халықтың қарғысына қалып жүрміз» дейді. «Бір айға жуық уақыт бойы кезекте тұрып қажыдық» деген наразы топ «қаладағы газ құятын 5 бекеттің барлығын іске қоссын» деп талап қойып отыр. Ал, әкімдік "жағдай толық бақылауда" дейді. Алматыда Долана көшесіндегі бұл ұзын-сонар кезектегі автобустың барлығы газ құюға келген. 30-ға жуық автобустан тұратын сап 20 минутта бір жылжиды екен. Таңғы 5-тен бастап кезек алатын жүргізушілер түстен кейін ғана жолға шығамыз дейді. Соның кесірінен жолаушылардың да қоғамдық көлікті сағаттап тосып қалатынын жасырмайды. Ал автобустың кешіккенінен жүйкесі жұқарған жұрт, бар арыз-шағымын бізге жаудырады дейді жүргізушілер. Қаладағы шүмегінен газы ағып тұрған бекеттің екіншісі Райымбек пен Момышұлы көшелерінің қиылысында орналасқан. Қай қырынан қарасаң да, мұндағы кезектің соңы көрінбейді. Ұзын-сонар кезек өзімізді қажытып, берекемізді кетірді деген жүргізушілер қалған 3 бекеттің барлығын іске қосуды талап етті. Автобекеттер бұған қатысты еш пікір бермеді, камераға ештеңе түсіртпеді. Ал, Алматы әкімдігінің өкілдері бұл жағдай толық бақылауымызда деуден әрі аспай отыр. Айтуларынша, мегаполисте 6 газ құю бекеті бар. Соның екеуі емес, үшеуі де жұмыс істеп тұр. Енді келесі айда тағы 2 бекетті іске қоссақ, мәселе толық шешіледі деп сендірді. ОМАРХАН АБЫЛАЙХАН, Алматы қалалық қоғамдық көлікті бақылау бөлімінің басшысы: – Алдымызда 15 шілдеде "АвтоГаз Алматы"-ның бір газ құю бекеті жөндеу жұмысынан кейін қайта іске қосылады. Сонымен қатар жеке кәсіпкер 20 шілдеден бастап, жаңа күш-қуаты жеткілікті үлкен газ бекетін іске қосуды жоспарлап отыр" Әкімдіктегілер қазір қалада бір тәулікте 500 қоғамдық көлікке газ құюға шамамыз жетеді дейді. Ал, жыл соңына дейін қалған бекеттер жөнделіп, жалпы 7 бірдей бекет жұмыс істейтін көрінеді. Соған қарағанда газ кезегіне кеткен қоғамдық көліктерді жұрттың әлі сағаттап тосуына тура келетін сыңайлы. . . . Бізді әлеуметтік желіде оқыңыздар: Youtube -   / @informburo31kanal   Facebook -   / informburo31   Instagram -   / informburo31   Vkontakte - https://vk.com/informburo31 TikTok - www.tiktok.com/@informburo31 WhatsApp Информбюро +7 777 331 31 31 #Информбюро #Ақиқатын_Айтайық #ИнформбюроЖаңалықтары #БүгінгіЖаңалықтар #БастыЖаңалықтар