ТОҶИКИСТОН ДАР ГИРДОБИ БАЛО

#таджикистан #новости #сегодня МУХТАСАРИ БАРНОМАИ НАВ гуфтор дар боби имрӯз ва фардои Тоҷикистон Ватани мо - Тоҷикистон дар бунбаст қарор дорад. Бунбасте, ки оқибаташ ба нестӣ меоварад. Шарт нест, ки як миллатро саросар бикушӣ ва он нобуд гардад. Танҳо сарҳои баланд ва мағзҳои мутафаккири онро бояд бибурид ё ба зиндон андохт ва ё водор ба муҳоҷират кард, дигар он миллат ба ғулом ё пору барои замини дигарон мубаддал мегардад. На ҳукумати имрӯза тавони дигар кардани СИСТЕМАро дорад, на оппозитсия - мухолифати имрӯза. Ҳамин status quo - вазъи ҳозира, солҳои тӯлонӣ идома хоҳад кард. Ҳукумат дигар одат кард, ки ба ҳар амал даст бизанад, пашшае ғинг намегӯяд. Хоҳад зиндон мекунад, хоҳад ришатро мегирад. Хоҳад ба зани касе сатр мепӯшонад ва ё мини-юбка. Хоҳад чароғатро рӯшан мекунад, хоҳад мекушад. Хоҳад лашкар мекашад ва тамоми норозиёни ин ё он минтақаро қир мекунад. Куштори озодихоҳони Бадахшон поёни достони ин қассобхона ва Сарқассоби Тоҷикистон, ки ҳама дар наздаш таъзим мекунанд, нест. Заҳҳок хун мехоҳад. Бидуни хун хуни худаш аз гардиш мемонад. Ин ҳукумат ба БОЗСОЗӢ ва ба БОЗНИГАРӢ омода нест. Бо рӯйихати аъзои порлумони нав сарсарӣ шинос шудам. Боз ҳамон Аҳмади порина: дузду ғару порахӯру «қаҳрамонон»-диссирнету дастболокунакҳо… Ба ҷои миллат аллакай депутатҳои ояндаро «интихоб» кардаанд. Ҷаноби президенти ояндаамон ҳам исмашон маълум: Рустами Эмомалӣ. Ба ҳоли миллате, ки чунин беъиззатиро мепазирад, мебояд бигирист. Аммо оби чашми ман дар ин ҳиҷрати беш аз сисола хушкидааст. Маъмулан ҷойгузини ҳар ҳукумат оппозитсия аст. Ман идеалист ҳастам, ормонгароям! Ман бар онам, ки агар ту мухолиф бошӣ, бояд аз як ҳукуматӣ дар дониш, инсоф, ахлоқ, адолатхоҳӣ ва мардумдӯстдорӣ як сару гардан боло бошӣ! Ҳеч гоҳ оппозитсияи тоҷик чунин бадном набуд. Он қадар мӯру малах, луттию мутта, фасаю фатта худро мухолифу мубориз эълон карданд, ки дигар вожаи «мухолиф» ва «мубориз» макрӯҳ шуд. Ин дег ҳам ба қатрон ниёз дорад. Аммо боз ҳам ин дегро бо ҳезуму ангишти молу ҷони ин миллати ҷафодида хоҳанд тафсонид? Наворҳои пучу бемаънии чор-панҷсоата, ҳақорату дашном ва тӯҳматномаҳои ҳамарӯзаи «мухолифони содиротӣ» оҳиста-оҳиста харидорашро гум мекунад. Танқиду тавҳини чанд бедаҳан ва номгум ба таърифу таҳсини ҳукумат бадал мегардад. «Агар ҳаминҳо душмани Эмомалӣ Раҳмон бошанд, беҳтараш МО - дӯсти Эмомалӣ Раҳмон бошем!» - чунин суханҳоро зиёд шунидаам. Тамошобинони ин ҳарзаномаҳо муҳоҷирони бечораянд, аксари онҳо баъди кори тоқатшикан на ба театр мераванд, на ба кино ва на сайри порку боғе. Телефонро рӯшан мекунанд ва то номи барнома нарасида хобашон мебарад. Аз ҷанги беамони мухолифон байни ҳам, занозанию кордкашӣ ва ҳатто истифодаи яроқ, сохтани гурӯҳу эътилофҳои ҷаълӣ дар Аврупо намегӯям. Дар дохили Тоҷикистон аз оппозитсия нишоне намонд. Бо марги Раҳматулло Зоиров ҷанозаи оппозитсия ҳам хонда шуд. Дар хориҷа баъди омадани «мухолифони содиротӣ» - ононе, ки то соли 2015 ҳамбистару ҳамсӯву ҳамтиҷорати ҳукумат буданд, оппозитсияи тоҷик пора-пора фасл шуд ва васли он ъамали осон нест. Ҳукумат занситез аст. Оппозитсия ҳам. Ҳукумат ба либоси занон дармеафтад. Оппозитсия ҳам. Яке сатрро хуш надорад, дигаре либоси ҳозиразамонро. Ҳукумат дар ғами мардум нест. Оппозитсия ҳам. Ҳукумат, ҳар ки бо ӯ нест, душман мехонад. Оппозитсия ҳам. Ҳукумат томот мебофад. Оппозитсия ҳам. Ҳукумат ваъдаи биҳишт медиҳад. Оппозитсия ҳам. Ҳукумат ҳар дигарандешро душман мехонад. Оппозитсия ҳар касе танқид кунад мушрику ҷосус эълон мекунад. Ба як ибора «кал - додари кӯр». Миллате, ки ҳукумати солим надорад, як рӯяш сиёҳ аст, миллате, ки оппозитсияи солим надорад, ҳар ду рӯяш сиёҳ аст. Агар мо ба ин ҳукумат ва ба ин оппозитсия бовар надорем, оё роҳ, роҳкор ва роҳбаре пайдо хоҳем кард, ки аз ин вартаи навмедӣ ва афсурдагӣ бурун биёем? Роҳи раҳоӣ аз ин рӯсиёҳӣ куҷост? Ба суоли «чӣ бояд кард?» ки посух меёбад? Калиди ин сандуқчаи сеҳрнок дар дасти кист? Худо ба ҳамроҳ! То дидор дар Душанбе! Д. А.