“Müəllimləri tanıdırıq, uğurlarını paylaşırıq” layihəmizin qəhrəmanı Səbinə Mirzəyeva.

Bəzən bir insanın həyat hekayəsi özü bir məktəbə çevrilir… “Müəllimləri tanıdırıq, uğurlarını paylaşırıq” layihəmizin budəfəki qəhrəmanı Səbinə Qorxmaz qızı Mirzəyevadır. Səbinə xanım A. Vəliyev adına 258 nömrəli tam orta məktəbin ibtidai sinif müəllimi, şəhid baş leytenant Cavid Azər oğlu Mirzəyevin həyat yoldaşıdır. O, həm peşəsinə sədaqəti, həm də həyatın çətin sınaqları qarşısında nümayiş etdirdiyi cəsarəti ilə tanınmağa, tanıdılmağa və hər kəsə nümunə olmağa layiq bir qadındır. Şagirdlərinin sevgisini qazanan, pedaqoji fəaliyyəti ilə yanaşı, şəxsiyyəti və həyat mövqeyi ilə də seçilən Səbinə xanım müəllimliyin yalnız bilik öyrətmək deyil, həm də insan yetişdirmək olduğunu xatırladır. Biz istədik ki, onu daha çox insan tanısın. Çünki belə qadınların hekayələri yalnız danışılmamalı, həm də yadda qalmalıdır. Onların həyatında cəsarət, ləyaqət, ana qayğısı və müəllim məsuliyyəti bir araya gəlir. Bu dəfə Səbinə xanımın səsini özündən eşidək, düşüncələrini və həyat hekayəsini onunla birlikdə kəşf edək. Müsahibəmizi sizə təqdim edirik!