Pendimi, rruga drejt shërimit dhe rikthimit te Perëndia- Predikim nga Atë Spiro Topanxha

Si e shohim mëkatin, pendimin, Kishën dhe veten tonë? Këto janë pyetje që na ftojnë të shohim me sinqeritet gjendjen tonë shpirtërore dhe marrëdhënien tonë me Perëndinë. Zoti nuk e kufizon njeriun dhe as nuk e largon për shkak të plagëve të tij. Përkundrazi, Krishti i thotë: “Eja pranë Meje!” Ai na thërret jo për të na dënuar, por për të na shëruar. Hyn pikërisht aty ku njeriu është i plagosur, aty ku ka dhimbje, dobësi dhe nevojë për mëshirën e Tij. Thirrja e Krishtit është një thirrje për pendim, ndryshim dhe jetë të re. Ai na fton të lëmë pas gjithçka që na mban të lidhur me mëkatin dhe të ngrihemi për ta ndjekur Atë. Pendimi është shkëputja nga gjithçka që na mban të lidhur dhe kthimi i zemrës drejt Perëndisë. Ai nuk është thjesht keqardhje për atë që kemi bërë, por një ndryshim i thellë i mendjes, i zemrës dhe i mënyrës sonë të jetesës. Sepse shërimi shpirtëror nuk është vetëm shpallje e pafajësisë. Ai është ripërtëritje e njeriut, shërim i plagëve të tij dhe rikthim në Perëndinë. Krishti nuk na thërret të qëndrojmë të burgosur të së kaluarës sonë, por të ngrihemi, të ndryshojmë dhe të ecim pas Tij, drejt jetës së re që Ai na ofron. “Lër gjithçka, ngrihu dhe eja pas Krishtit!”