يا رحمن أرحم بي جودك - نظم الشيخ حاج الماحي رحمه الله - أداء أولاد حاج الماحي

يارحمَـن ارَحم بى جَودك دَلَى الغِيث ينزل فى بُلُودَك سَم يَا فَمِّى اذكُر معبُودك قُول يا واحداً حَى فى وُجُودَك يا مُسعِد أسعِد بسعودك ونِحنَ نَصَلى على مَريُودَك يا رحمان ارَحم بى بِرَّك يا حَافِظ فى بَحَرك وبَرَّك فى وِليَانَك أطلِق سِرَّك خَلْ نِيشَانُن اليِتحرَّك آمِين آمِين يا كَاشفَ الغُمَّه جَنِّب هَا الدَّابِى تَصَبِّحُو رِمَّه تَسلِّط واحداً إيدُو مُدَمِّة يَعَجِّل قَتلُو قَبيحَ القِمَّه يا الخُلفَا الحَالكُم مرضِيه يا أهلَ البِيعَه العَقدَّوا النِيَّه التُمسَاح سَكَن الشَّايقيَّه خلُّو يَرُوح نَسيَاً مَنسِياً يا ابنِ ادرِيس عدِّل نِيشَانَك فُوقَ الكُل عَامِر دِيَوانَك هِمْ يا شِيخ النَّاس حِيرانَك فى التُّمساح بيِّن بُرهَانَك يا ابنِ ادريس شِيخنا النُّورَانى يَا صَاحب الفَتحَ الرَّبَّانى يا ابنُو العَركِى ويا السَّمَّانِى أرمُوا سهَامكُم يا فُرسَانى شْيْ لله ذَاتَ التَّجَلى صاحبَ السِّر والفَتحَ الكُلِّى يا الغُوث البِى الكُون مِتوَلِّى التَّصرِيف هِيلَك عَجِّلى يا عبدَ الوهابَ التَّازِى يا أب دِرعاً مَنسوب بِى حِجَازى التُّمسَاح تُمسَاحاً خازِى دُرنا العُوم أدُّونَا الاجَازِى يا الدَّاسُوقِى وشِيخُو رُفَاعِى يا حَسَن التَّوَّاع كُون وَاعِى الشِّبلِى وشِيبَان الرَّاعِى أرمُوا سِهَامكُم يا شُجَّاعِى شيْ لِله يا اهلَ الدَّايرَه يا الفِى الكُون اسَرَاركُم سَايرَه أرخُو السِّر فى السُّحره الغَايرَه خَلُّو الدَّار التَصبِح نَايره وِينكُم لِى وِينكُم يا قُومنا سَهرَانِين نَحَسِب فى نُجُومنا التُّمسَاح حَجَّر لِى عُومنا إن ما جِيتُونا عَلِيكُم لُومنَا وِينكُم لي وِينكُم يا دِيلَه يا أهلَ الحَضرَة الَّليلَه الَّليلَه اجتمَعُوا وخَلُوا البِهدِيلَه التُّمسَاح أحَمُوهُو الشِّيله وِينكُم لِى وِينكُم يا كُمَّل يا لُحَّاق فيكُم بتَأمَّـل يا الغُوث البِى الكُون اتْحمَّل عِرضَ الدَّار روَّح يِتهَمَّل وِينكُم لِى وِينكُم يا كُثَّر يا لُحَاق فِيكُن بدثَّـر التُّمسَاح بِلحِيل انجَسَّر أمرُو عَليكُن مَاب يتَعَسر شيْ لله يا حَسَن البَصرى صِهِيبَ الرُّوم ذا النُّون المِصرى يا الدَّبَّاغ أبُـو سِراً يَسرِى يَا ابن محجُوب النَّاس مِتحَسرِى شيْ لله يا أب جَلَّابيه يا عُثمَان شِيخ الخَتمِيه يا الصُّلَّاح جُملَة الأوليَّــا التُّمسَاح شُوفولو أذِيَّه شيْ لله يا رَاجلَ البُقعَه يا أهلَ الحَضرَه البَعَدَ الهَجعَه يا الفَكِى شِيخَ الهَام أب لَسعَه شِيلَ الدَّابِى تِحتكُم بِدعه شيْ لله يا عَبد القَادِر مُحِى الدِّين البَحَر السَّادِر يا ود زِينَب قُومْ لِى مُبَادِر يا ود حَاج قُول جِيتكُم حَاضِر شيْ لله يا رَاجلَ البَركَل يا قَايمَ الَّليل مابْ تَكسَل يا عَايِم بِاللهِ إتوكَّل قُول للدُّود من بَلَدِى اتفضَّل يا اهل الرَّكبَ الفَات بِى ليلو مَا فِيكُم واحداً شَاد حِيلُو أحمد واحمَد واحمد شِيلُو ودْ عَدلَان فُوق رَاسُو أدِيلُو يَـا يَـاسِين يا وَد حِّمِيده يا أهلَ القُبَّه البَاقيه فَرِيده انتُـو ما اتبَاطِيتُو أكِيده ما بتَغلِبكُم هذِى الصِّيده يا رِجَّالَه نُورِى اتلَمُّوا خَلُّو الغفله جَميعكُم هِمُّوا محمد صَالِح قام بى عَمُّو لَطَمَ الدُّود بِالسِّر فُوق فَمُّو يابَا حَمدتُو أب نَايبا شُوكَه صَاحِب سِر وايدَك مبرُوكَه يا أب نِيرَان الحَقنَا بأبُوكَا هِمِ يَا شِيخ النَّاس زَمُّوكـا يا الفَكِى شِيخَ العَبدَ الصَالِح يا لحَّاق فِى بَحَر المَالح ود بِيلِى وعُوُّوضَه القَارِح ويَن حَاج عِيسِى القِدَرَ الطَّامِح يا أب شَارِب وأولَادُ السِّتَّه أمَانِى عَلِيكم لِيش هَـا السَّكتَه أسمَع يَا شِيخ القُول لِيك انتَ جَرَت الحِين فى بلادكُم نُكتَه الزُّرُق أبْواتْ ود حَاج مُوسَى يا الكُمَّل ما فِيكُن دُوسَه البَلدَ الكَانَت محرُوسَه اتحَجَرَ العُوم والنَّاس مَحَبُوسَه يا وَد جَابِر لِيكَ بَنَادى قُوم بِا خَوانَك لَا البُولَادِى يا العَجَمِى أب زَرقاً صيَّادى أُخذُوا الشَّكرَه العَادِى العَادِى يا اولَاد جَابِر بِى عَجَمِيكُن قُومُوا الخَمسَه واكُربُوا سِرِيكُم نَادُوا أب رَابعَه وخَلُّوا يَجِيكُم قَتلَ الدُّود مُو قَاسِى عَلِيكُم يا ورَّاق يَجن حُوبَاتَك فِى التُّمسَاح بيِّن آيَاتَـك خَلُّو يَصَوِّب مِن بِـلدَاتَك لا يتمسخر فِى زَورَاتَك شيْ لله يا رِجَّالَتنَا شَرفَ الدِّين فُرسَان المَتنَه صَالحَ السَّلَمِى اسَمعُوا كَلِمتنَا أحَبسُوا الدُّود لا يَطُل صَفحتنَا يا النَّبِى بِجَاهَك ثَبِّتنَا أحَفظنَا واستُر غُربَتنَـا أكوِى أعدانا وكِيد شَامِتنَا فى الدَّارِين اكتُب راحَتنَا النِّبيَان يا جُملَه صَحَابِى الغُوث يا قُطبَ الأقطَابِى الشِّبلِى وبَدَوِى النَّشَّابِى أرخُو السِّر فى هَذا الدَّابِى عَلَى المَحبُوب صَلْ يُوتْ يَـا بَـرَّا عَدَد مَخلُوق جميع لَا الذَّرَّه نَظَملُوا الماحى قَصِيده وجَرَّا تَنَجِّى الأُمَّه فى يُـوم الحَرَّا صَلَاةُ الله عَدَد مَـا لَبَّـا وِقَّافَ الحَجْ وَطَوَاف الكَعْبه سَلاماً جابُوا الماحى معَبَّـا يَعُمَّ السِّيد والآل والصَّحبَا