كنتم فين وضياء العوضي عايش ؟

المؤمنين بضياء العوضي بيقولوا إنه تحدى كل الأطباء لمناظرته ومحدش قدر يناظره في حياته والنهارده طلعنا نتكلم.. ضياء العوضي في شهر فبراير الماضي قدم فيا دعوى بنفسه عند النائب العام يتهمني فيها بالسب والقذف والتشهير.. المثير للدهشة إن محتوى الدعوى كان لينكات الفيديوهات والبوستات اللي عملتها للرد العلمي على نظامه واللي هتلاقوها على الصفحة.. بوستات كان محتواها تفكيك نظام الطيبات وخلت من تناول الشخص نفسه.. وده كان عكس اللي عمله بعدها لما سافر وقعد يشتم فيا وفي بعض الناس المحترمة اللي ردت عليه ردود علمية.. بداية اهتمامي بنظام #الطيبات كانت مع حالة زرع الكلى اللي نشر إنه وقف لها كل أدوية المناعة ساعتها علقت عنده إن فيه احتمال انه بيكذب أو عمل حاجة جديدة محدش عملها أو تكون الكلى بتتدهور وهو ميعرفش .. كلمني هاتفياً واداني رقم المريضة وكلمتها.. واتفاجئت بأنه أقنعها توقف عمل اي تحاليل تخص وظايف الكلى.. مريضة زرع قعدت سنة كاملة بدون اي تحاليل للكلى لأنه قالها حتى لو التحاليل عالية المهم إنك حاسة إنك كويسة.. وهنا كلمته تاني وقلت له حضرتك كده بتضر المريضة ولازم نتابع التحاليل لأن السونار وحده لن يتغير حتى لو الكلى تضررت.. ودي معلومات أصغر طبيب كلى عارفها لكنه فضل يجادل لمدة ربع ساعة ويقول إيه علاقة الكرياتنين بكفاءة الكلى.. حاجة كده زي ما تجادل في إن الشمس بتطلع بالنهار.. بعدها حاول يستشهد باسمي عشان ينشر تآني الخطأ ده اللي ممكن يدمر حياة المئات من مرضى زراعة الكلى لو قلدوها ووقفوا العلاج.. فكتبت بوست ورديت عليه إن الكلام ده خطأ علمياً.. قام عامل بلوك ليا وحذف الرد بتاعي وكتب على صفحته إني كذاب بعد ما كان بيحاول يستشهد بيا.. بعدها تفاجئت بكم الجروبات اللي عاملها المتابعين بتوعه وبكم المغالطات العلمية في النظام.. وقررت إني اقوم بدوري وواجبي في توعية الناس عن النظام .. فقدم فيا الدعوى دي.. ضياء كإنسان خلاص أفضى إلى ما قدم.. وكنت أتمنى أن تغلق هذه الصفحة بوفاته.. لكن مش صحيح إنه محدش من الأطباء قدر يناظره.. هو كان شايف إنه مرجعية نفسه وأي مريض بيلاقي إنه فشل في علاجه أو صحته تدهورت بيتهمه هو بالتقصير وعدم الالتزام بالنظام.. واللي أشهد به أمام الله إن نظامه كان بعيد كل البعد عن قواعد العلم وإن نصائحه للمرضى بترك العلاج أدت بشكل مباشر إلى مضاعفات صحية خطيرة. #كلام_في_الطب_د_محمد_ممدوح