យុវតីជាប់បាក់ឌុប វ័យ១៧ឆ្នាំ តស៊ូជិះម៉ូតូជាង ៤០០គីឡូម៉ែត្រ ២នាក់ម្តាយកូន ពីខេត្តឧត្តរមានជ័យ មកភ្នំពេញ

យុវតីវ័យ១៧ឆ្នាំ ជាប់បាក់ឌុបនិទ្ទេស C តស៊ូជិះម៉ូតូជាង៤០០គីឡូម៉ែត្រ ពីរនាក់ម្តាយកូនពីខេត្តឧត្តរមានជ័យមកភ្នំពេញ ដើម្បីស្វែងរកអនាគតថ្មី មានស្រុកកំណើតនៅភូមិដងទង់ សង្កាត់កូនក្រៀល ក្រុងសំរោង ខេត្តឧត្តរមានជ័យ យុវតី ខន លីលី វ័យ១៧ឆ្នាំ បានសម្រេចចិត្តចាកចេញពីស្រុកកំណើតជាមួយម្តាយ ដោយធ្វើដំណើរតាមម៉ូតូជាង ៤០០គីឡូម៉ែត្រ មកកាន់រាជធានីភ្នំពេញ ដើម្បីស្វែងរកការងារ និងឱកាសបន្តការសិក្សាថ្នាក់ឧត្តមសិក្សា។ ការធ្វើដំណើរមកភ្នំពេញនេះ ក៏មានន័យថា លីលី ត្រូវឃ្លាតឆ្ងាយពីលោកឪពុក និងប្អូនប្រុសស្រី ដែលនៅបន្តរស់នៅស្រុកកំណើត។ ការបែកចេញពីគ្រួសារ និងការចាប់ផ្តើមជីវិតថ្មីនៅទីក្រុង មិនមែនជារឿងងាយស្រួលសម្រាប់យុវតីវ័យ១៧ឆ្នាំរូបនេះឡើយ ប៉ុន្តែវាគឺជាជំហានមួយដែលនាង និងម្តាយសម្រេចចិត្តធ្វើ ដើម្បីស្វែងរកឱកាសសម្រាប់អនាគត។ ថ្វីត្បិតធ្លាប់រស់នៅតំបន់ដែលរងផលប៉ះពាល់ពីសង្គ្រាមឈ្លានពានរបស់ថៃ និងត្រូវស្នាក់នៅ ព្រមទាំងសិក្សានៅតំបន់ជម្រកជនភៀសខ្លួនក៏ដោយ ក៏ លីលី មិនបោះបង់ការសិក្សាឡើយ។ ដោយការខិតខំប្រឹងប្រែង នាងបានប្រឡងសញ្ញាបត្រមធ្យមសិក្សាទុតិយភូមិ និងទទួលបាននិទ្ទេស C កាលពីពេលថ្មីៗនេះ។ ក្រោយមក ពេលមកដល់រាជធានីភ្នំពេញដំបូង លីលី និងម្តាយត្រូវបង្ខំចិត្តស្នាក់នៅទីអារាម ដោយសារមិនទាន់មានលទ្ធភាពជួលផ្ទះ។ បច្ចុប្បន្ន លីលីស៊ីឈ្នួលលក់គ្រឿងសមុទ្រ ដើម្បីរកចំណូល ២ម៉ឺនរៀលក្នុងមួយថ្ងៃ ខណៈម្តាយធ្វើការនៅរោងចក្រ ទទួលបានប្រាក់ឈ្នួល ៥ម៉ឺនរៀលក្នុងមួយថ្ងៃ។ អ្នកទាំងពីរបច្ចុប្បន្នរស់នៅបន្ទប់ជួលតូចមួយនៅតំបន់ផ្លូវវេងស្រេង ក្នុងតម្លៃប្រមាណ ៤០ដុល្លារក្នុងមួយខែ។ ជីវភាពប្រចាំថ្ងៃនៅមានការលំបាក ហើយប្រាក់ចំណូលដែលរកបានត្រូវចំណាយលើការរស់នៅ និងការចាំបាច់ផ្សេងៗ។ សម្រាប់លីលី «ការអប់រំ» មិនមែនគ្រាន់តែជាចំណេះដឹងទេ ប៉ុន្តែជាស្ពានសម្រាប់ផ្លាស់ប្តូរជីវិត និងអនាគត។ ប្រសិនបើអាចសន្សំប្រាក់បានគ្រប់គ្រាន់ និងមានឱកាសបន្តការសិក្សាថ្នាក់ឧត្តមសិក្សា នាងមានក្តីស្រមៃចង់រៀនជំនាញច្បាប់ ដើម្បីក្លាយជាមេធាវីនៅថ្ងៃអនាគត។ សម្រាប់យុវតីវ័យ១៧ឆ្នាំរូបនេះ ការចាកចេញពីស្រុកកំណើត និងការឃ្លាតពីមនុស្សជាទីស្រឡាញ់ មិនបានធ្វើឱ្យក្តីស្រមៃរបស់នាងរលត់ឡើយ។ ផ្ទុយទៅវិញ ការលំបាកទាំងនេះកំពុងក្លាយជាកម្លាំងជំរុញឱ្យនាងបន្តតស៊ូ ដើម្បីឈានទៅរកអនាគតដែលនាងចង់បាន៕ Follow Kampuchea Thmey TV for more: Facebook:   / kptdaily   Telegram: https://t.me/kampucheathmeytv Tiktok:   / kampuchea_thmey_daily