លោក ប៉ែន បូណា ទាមទារឱ្យលោក សម រង្ស៊ី បំភ្លឺការអះអាងថាកម្ពុជាបាញ់ថៃមុន

អ្នកនាំពាក្យរាជរដ្ឋាភិបាល លោក ប៉ែន បូណា បានចេញសេចក្តីថ្លែងការណ៍បដិសេធចំពោះការផ្សាយរបស់សារព័ត៌មានថៃ Top News ដែលដកស្រង់សម្តីអតីតមន្ត្រីជាន់ខ្ពស់ថៃម្នាក់ អះអាងថា លោក សម រង្ស៊ី បាននិយាយថា កងកម្លាំងកម្ពុជាជាភាគីបាញ់ប្រហារថៃមុន។ លោក ប៉ែន បូណា បានទាមទារឱ្យលោក សម រង្ស៊ី ចេញមុខបញ្ជាក់ការពិតជាសាធារណៈ។ ក្នុងសេចក្តីថ្លែងការណ៍ចុះថ្ងៃទី១២ ខែតុលា ឆ្នាំ២០២៦ លោក ប៉ែន បូណា បានឱ្យដឹងថា កាលពីថ្ងៃទី១០ ខែតុលា សារព័ត៌មានថៃ Top News បានផ្សាយកិច្ចសម្ភាសន៍ជាមួយលោក Nantiwat Samart អតីតអនុប្រធានការិយាល័យស៊ើបការណ៍សម្ងាត់ជាតិ និងជាអតីតលេខារដ្ឋមន្ត្រីក្រសួងការបរទេសថៃ ដោយបានអះអាងថា លោក សម រង្ស៊ី បានលើកឡើងថា កងកម្លាំងកម្ពុជាជាភាគីបាញ់ប្រហារថៃមុន ដែលនាំឱ្យភាគីថៃតបតវិញ។ ការអះអាងនេះ ក៏ត្រូវបានអ្នកប្រើប្រាស់បណ្តាញសង្គមចែករំលែក និងធ្វើអត្ថាធិប្បាយយ៉ាងច្រើនផងដែរ។ អ្នកនាំពាក្យរាជរដ្ឋាភិបាលបានបដិសេធទាំងស្រុងចំពោះការលើកឡើងនេះ ដោយបញ្ជាក់ថា ភាគីថៃជាអ្នកបាញ់មុន។ លោកថា បញ្ហានេះត្រូវបានសម្តេចធិបតីនាយករដ្ឋមន្ត្រី ព្រមទាំងក្រសួងការពារជាតិ និងក្រសួងការបរទេសនិងសហប្រតិបត្តិការអន្តរជាតិកម្ពុជា បញ្ជាក់ច្បាស់លាស់រួចហើយ។ ជាមួយគ្នានេះ លោក ប៉ែន បូណា បានទាមទារឱ្យលោក សម រង្ស៊ី បញ្ជាក់ជំហរចំពោះការផ្សាយខាងលើ ដោយលើកឡើងនូវលក្ខខណ្ឌចំនួន៣។ ទី១. ប្រសិនបើលោក សម រង្ស៊ី មិនបាននិយាយដូចការផ្សាយរបស់សារព័ត៌មានថៃទេ លោកត្រូវចេញមុខបដិសេធជាផ្លូវការ។ ទី២. ប្រសិនបើលោកពិតជាបាននិយាយដូចការអះអាងនោះមែន លោកត្រូវសុំទោសប្រជាពលរដ្ឋខ្មែរជាសាធារណៈ ដោយអ្នកនាំពាក្យរាជរដ្ឋាភិបាលចាត់ទុកថា ការនិយាយបែបនេះជាអំពើក្បត់ជាតិដ៏ធ្ងន់ធ្ងរមួយ។ ទី៣. លោក ប៉ែន បូណា បានលើកឡើងថា ប្រសិនបើលោក សម រង្ស៊ី មិនចេញមុខបដិសេធជាផ្លូវការចំពោះការផ្សាយនេះទេ នោះត្រូវចាត់ទុកតាមការអះអាងរបស់អ្នកនាំពាក្យថា លោក សម រង្ស៊ី ពិតជាបាននិយាយដូច្នោះមែន។ អ្នកនាំពាក្យរាជរដ្ឋាភិបាលបានបង្ហាញក្តីសង្ឃឹមថា លោក សម រង្ស៊ី នឹងមានភាពក្លាហានចេញមុខបញ្ជាក់ការពិតចំពោះបញ្ហានេះ ដើម្បីឱ្យសាធារណជនបានជ្រាបច្បាស់៕ Follow Kampuchea Thmey TV for more: Facebook:   / kptdaily   Telegram: https://t.me/kampucheathmeytv Tiktok:   / kampuchea_thmey_daily