เนื้อเพลง ฮอยญ้อหอเผิ่ง | วิทยาลัยนาฏศิลปจันทบุรี

เนื้อเพลง ฮอยญ้อหอเผิ่ง (ปราสาทผึ้งชาวญ้อสระแก้ว) P1 (ผญา) โอน้อท่านเอ๋ย เฮียมสิเหล่าพากษ์พื้นปางบุญประเพณี มีแต่โบฮานกาลได้สืบสานซูไว้ ฝ่ายฝูงคนไทญ้อยอย้องซ้องส่า โฮมเอ็ดผาสาทเผิ่งใสเลิงล้ำสืบนำแนว ทางจังหวัดสระแก้วนี้ละบ่อนจาไข สาธกในพุทธประวัติศาสนาเฮานี้ เพิ่นบัญญัติตรัสชี้เถิงการก่อกุศลใหญ่ คราวยังบ่ทันตาย ให้เฮาเอ็ดผาสาทเผิ่งเพิ่งซ้นบุญผลา ยามเบิ๊ดแฮงอ่อนล้ามรณะตายเสีย สิได้เฟียผลบุญหนุนนำส่งยู้ ได้ไปเนาว์อยู่ยั้งเทิงปรางค์ทองผาสาทใหญ่ ในสวรรค์ชั้นฟ้าผลากุ้มเหลื่อมบัง กุศโลบายเอ่ยอ้างแจ้งกระจ่างจิตใจ โครงไม้ไผ่เปรียบเปรยเป็นกระดูกเฮาส่อยซูร่าง อันว่าทางกาบกล้วยคือเนื้อหนังตุ้มหุ่มห่อ ดอกเผิ่งบานพ้อว้อ แทนความงามของเฮานี้จีรังแท้บ่ฮ่อนมี สาแล้ว P2 (ทำนองแปลง) สิอยู่กะเล๋อ สิเอ็ดบ่ะเต๋อ เฮามาโฮมเจ๋อ โฮมแฮง โฮมกัน มื้อสันวันนี้ ว่าเป็นมื้องานเสพซ้องสะหลองงันบุญประจำปี เสียงดนตรีมโหรีเนืองนอง ละฮ่วนละฮ่วนๆก้องดังมาถี่ๆ แล้วจั่งว่าไทญ้อเฮานี้บรบวนถ้วนถี่มาลงฟ้อนนำกัน กะโหย๋ย้อนแหย่งกะตกแต่งแปงสรร ละจัดการจัดงานเสพงันให้ม่วนงิน เอ็ดผาสาทเผิ่งสมเจ๋อถวิล จักเสียงแคนเสียงพิณพากันแหนแห่ ละแลละแหล่ละแล่นแตร่ ละแลละแหล่ละแล่นแตร่ ละแลละแหล่ละแล่นแตร่ ละแลละแหล่ละแล่นแตร่ เทิงอีพ่ออีแม่พี่น้องบ้านเฮา มาโฮมมาเต้าแห่ผาสาทพร้อมพร่ำ (ทำนองแปลง) ผาสาทเผิ่งฮูบทรงพระธาตุ บัวระบัดจัดแจงแต่งสี เสริมทรวดทรงองค์สถูปเจดีย์หรือทรงดอกบัวเหลี่ยมนี้มีมาช้านาน เฮ็ดคือฮูบองค์พระธาตุพนมพระธาตุเชิงชุมคู่แคว้นแดนอีสาน พระธาตุศรีสองรักษ์เป็นหลักธรรมค้ำสถาน พระธาตุบังพวนล้วนตระการสืบสานฮีตฮอย ผาสาทเผิ่งฮูบทรงหอผี เฮ็ดคือเฮือนเฮานี้ดาดีเลิศลอย ตกแต่งเอ้เป็นหลังน้อยๆสืบฮีตตามฮอยบ่มีถอยต้อยต่ำ ย้อนความเชื่อของคนอีสานมเหศักดิ์หลักบ้านศรัทธาน้อมนำ และศาลพระภูมิศาลปู่ตาให้หลิงหล่ำ ประดับประดาดีล้ำมาพร้อมพร่ำเพียง ผาสาทเผิ่งฮูบทรงบุษบก ได้ยอยกมาฮ่วมโฮมเฮียง เฮ็ดคือหอธรรมมาสน์สมส่าลือเสียงหลั่งไหลร่ายเรียงโดยเพรียงพร้อมพร่ำ หลังคาทรงมณฑปจบเจือจั่งแม่นโพดเอาเหลือเห็นแล้วสะออนงาม โตเฮือนโล่งโปร่งใสเหลืองอร่ามทางฐานทึบล้ำแล้วลงลิงลาย ผาสาทเผิ่งทรงจตุรมุข แสนผาสุขทรวดทรงงามหลาย จำลองจากราชมณเฑียรยิ่งใหญ่ตั้งอยู่ในบรมมหาราชวัง มีแผนผังเป็นรูปกากบาทสวยงามโอภาสบ่จืดบ่จาง มีสันหลังคาจั่วสี่หน้าบันจัดวาง บรบวนพร้อมพรั่งสิพากันแห่ถวาย (เสียงสวดมนต์เย็น) P3 (พูด) มื้อนี้เป็นมื้อใหม่ไชยมงคล ผู้ข้าทั้งหลายขอน้อมถวายผาสาทเผิ่งต่อพระสงฆ์องค์เจ้า ให้ฮับเอาต้นผาสาทที่ผู้ข้าหมายมาดก่อกุศลในยามนี้แด่ถ่อน (คำกล่าวถวาย) มยํ ภฺนเต อิมํ สปริวารํ มธุปุปฺผปาสาทํ อิมสฺมิ วิหาเร ภิกขุสงฺฆสฺส โอโณชยามะ สาธุ โน ภฺนเต ภิกขุสังฺโฆ อิมํ สปริวารํ มธุปุปฺผปาสาทํ ปฏิคฺคณหตุ อมฺหากํ ฑีฆรตฺตํ หิตายะ สุขายะ (ทำนองประดิษฐ์) บุญออกพรรษา…มาฮอดแล้วตามฮีตตามแนวล้วนแล้วบรบวน นอบน้อมถวาย…ว่ายอส้วนกาลอันควรถ้วนถี่ดีงาม ผาสาทเผิ่งใสเลิงๆยิ่งแปงสรรสมสิ่งข้าคะนิงหลิงหล่ำ หากผู้ใดน้อมถวายจงจำสิเจริญในธรรมอานิสงส์หกกัลป์ กัลป์ที่หนึ่งเป็นที่รักมากมายผู้คนชอบใจทั่วบ้านย่านเมือง กัลป์ที่สองเกียรติปรากฏรุ่งเรืองสังคมลือเลื่องกระเดื่องแดนโลกา กัลป์ที่สามเป็นคนกล้าหาญมีความเชี่ยวชาญในสังคมมนุษา กัลป์ที่สี่มีสติปัญญา กัลป์ที่ห้ามีสติสัมปชัญญะ กัลป์ที่หกมรณาแล้วไปสู่โลกสวรรค์ เสพสะหลอง ตามฮีตคอง สุขสมปองดั่งจิตอธิษฐาน ให้มั่นยืน เกษมศานติ์ นิรันดร์กาลสืบนานตลอดไป ไทญ้อเฮาฮ่วมแฮงใจ ประเพณีบ่มีม้างมาย เป็นจั่งบุญหลายเพิ่งธรรมไท้…องค์พระโคดม ขับร้อง : พิมพ์ พรทิพย์ , ณดล ณัฏฐ์คเณศ คำร้อง : เกรียงเดช ผลทวี เรียบเรียงดนตรี : คีตะอีสาน