📍 سرّ المعدل ! / الإنجاز الاسبوعي 📚✏️/ دُفعة 2024

سر الأنجاز انت كطالب اذا خططت لاسبوعك وانجزت اغلب المهام وكان معدل انجازك 80% او اكثر ف التسعين بجيبك من هسة ( بشرط يكون انجازك صادق ومو تسليك ) واصلا ليش انخطط للاسبوع بالذات ؟ ليش منخطط ل شهر او للسنة الوزارية كلها؟ الجواب لانو الاسبوع فترة قصيرة متكونة من سبعة ايام على العكس لو خططت لشهر او للنسة كلها ! نسبة انك تلتزم بالخطة حتكون صعبة اذا ما جانت مو بس صعبة مستحيلة ك طالب مثلا ممكن هدفك قراية فصل من مادة الاحياء وفصل من الرياضات او تسد التراكمات خلال اسبوع فاذا خططت لاهالاسبوع بصورة صحيحة صدكني رح تخلص الفصلين او تخلص من التراكمات لانو من خلال هاي الفترة القصيرة تكدر تقيس مدى فعالية انجازك اليومي وتقدمك من الهدف النهائي كل اللي تحتاجه عشان تبلش اسبوع منجز هو ورقة و قلم اول شي مهم يكون عندك تصور لإيام اسبوعك اذا انت طالب فلازم يكون عندك جدول لحصص المدرسة والايام اللي عندك بيهم امتحانات ... والعطل وهكذا وطبعا تستغل العطل ومتنام بيهه للظهرية المهم فتبدا تخطط الورقة وتحدد ايام الاسبوع وبخانة كل يوم تكتب حصص المواد اللي رح تقراهم وترتبهم من المادة الاهم للأقل اهمية وتبدأ إنجازهم بنفس هالترتيب لنفترض انك خططت الورقة وجهزتها هسة تبدا تنزل المهام على الورقة .. والاولية للمهام الثابتة والمهام الثابتة بالنسبة للطالب هي مواعيد الامتحانات اليومية او الشهرية والامتحانات بشكل عام .... لا على التعيين عندك امتحان الاثنين اكيد حتكتبه بمربع السبت والاحد عشان تقراله زين واذا جان عندك امتحان الثلاثاء ف ايضا تكتبه اول مهمة من مربع الاحد والاثنين وبهالترتيب بالنسبة للامتحانات وبقية الدروس ترتبها من الاهم للاقل اهمية مثل ما حجينة وبعد متخلص كل درس تخلي مقابيله صح هالشي حيحفزك بشكل انت متتخيله اطلاقا عمود تقرا الدرس اللي بعده وشغلة مهمة لازم تتجنب الاوفر اجيفينج يعني من تخلص الدروس اليومية اللي عليك خلاص انت كفيت ووفيت، مهم يكون ليومك بداية واظحة ونهاية واظحة عشان متبقى تستنزف جهدك طول اليوم لانو هالشي حياثر سلبًا على انجاز اليوم اللي بعده وممكن الاسبوع كله وبنهاية الاسبوع يُفضل يكون عندك مراجعة لاسبوعك وتصلح الاخطاء اللي صارت مثل الكسل والتعاجز وكثرة النوم او تقلل من التسخيت والطلعات وغيرها وتلاكي طرق تناسبك انت تتناسب مع طبيعة حياتك اليومية حتىى تنجز المهام اللي عليك لانو جوهرة التخطيط، هي إيجاد طرق عملية؛ تخلي آداء مهامنا اليومية اكثر سهولة مهم مهم مهم جدا انك تاخذ يوم اجازة ويُفضل يكون عصر الخميس وصباح الجمعة ولا تفكر انو هذا اليوم بدون فايدة العكس صحيح لانو من خلال يوم الاجازة حتعيد شحن طاقتك للاسبوع المنجز الثاني والسلام 🌻