حكاية حنيني .. خالد الوقيت

خطي على صدري حكاية حنيني ياقافية شعر ٍ حدتني على البوح ما تكتبين الا شقاي وانيني ولا تبدعين الا اذا صرت مجروح والناس مبطي جابت العيد فيني وتقول ملّينا تناهيد واجروح ياخالد انسى كل لحن ٍ حزيني موجع يخلّي حيّ الاحساسمذبوح نبي قصيد ٍ يطرب السامعيني ويهيّض الورقا على وارف الدوح وانا ودين الحزن ماهوب ديني لو كنت ماادري غيب الاقدار باللوح لكني برجوى القوي المتيني اللي خلق فيني بتدبيره الروح مادام قلبي معه بين اصبعيني وشلون اناجي غيره اليوم وابوح كريم يابرق ٍ على النايعيني شعاني واربوعي ورا كير بالضوح عساه حروه بالهميل الغشيني يوم اعترض مابين مِسكه وأبو طلوح والبرق ينبش كل شي ٍ دفيني لاقام يوضي في دجى الليل ويلوح اخيله بعيني ودمعي بعيني من هاجس الذكرى على الخدّ مفضوح خلّى مُتالع والبويت بيميني واشفى ودربه يمّة اشماس مسموح ويوم ارتكى جنوبيّ الانعميني من فوق الارطاوي همى الوبل مسفوح واسقى الدّهَو والنّـِفْـد من رامتيني وغدى به روض مجيز غارق ومطفوح ارض تمشّيها يسرّ الحزيني اجيها من عصري إلى الليل واروح اشبّ لي مرماثة ٍ تهتويني لما ابهار الفكر يهتاض ويفوح احاول انسى ضيقة ٍ تعتريني لها بقلبي جرح ماهوب مدموح ماعشت ادوّر خافق ٍ يحتويني يسلى به البال المشتّت عن النوح طبعي اخبّي لوعتي في كنيني لو احترق غرس المشاعر من الفوح كل ماوردت احساس عِدّ ٍ رويني ظامي لقيته علقم الطعم مشحوح وعوّدت من نفسي بخفّيّ حُنيني وحالي على كفّ التحاسيف مطروح لكن ولو غرقت فبحري سفيني تشبّثت بعض الاماني على لوح مادام ربي في حياتي عويني باب الرجا به لآخر العمر مفتوح هو الذي انعم بعقلي وديني وعلّمني مايرفع نبا كل ممدوح ووهبني جود اللي غلاها ضنيني اللي لها بيت بالاضلاع واصروح ورزقني في أهل ٍ وناس ٍ تبيني واكسبني عِرفي كل وافي وطحطوح ما مدّ الاّ للتحـيّه يميني ابيض وجه لو وجه الايام مكلوح لولاك يامولاي ويلي وويني احدّث بفضلك وانا منك ممنوح ارجيك في دنياي لا تبتليني ولا تشمّت بي ملكّع ومشفوح يقيني فيك بكل حال ٍ يقيني وابصر بنورك درب الامال بوضوح يا كاتب ٍ مستقبلي في جبيني حقّق لقلبي منك رغبات واطموح بك التجي في ضيقتي واستعيني لا عاد صوتي من صدى الروح مبحوح ابعد .. وفضلك يا الهي يجيني اخطي وذنبي من جمايلك مصفوح تهافتوا في عيني المدّعيني وبقيت يامن بالملكوت سبّوح ادعيك وارفع لك بلهفه يديني واشرح ووضعي قبل لاقول مشروح يارب شفني حاير ٍ في سنيني واقف على رجم التناهيد وآنوح ارشدني لك يا هادي الحايريني يامنجي ٍ بالفُلْك يوم الغرق نوح اخاف زلاّتي ما بينك وبيني ياغافر الزلاّت تبعد بي الشوح واصير مثل معايد القريتيني اللي قضى عمره على غير مصلوح ارضاك أولى من رضا العالميني انت الإله وغيرك اوهام واشبوح خالد الوقيت