Yeni Klinikada daha bir uğurlu əməliyyat həyata keçirilib

“Yeni klinika” tibb müəssisəsində uroloji komanda tərəfindən icbari tibbi sığortanın Xidmətlər Zərfi daxilində sistolitotomiya (sidik kisəsi daşlarının çıxarılması) əməliyyatı icra olunub. Belə ki, anadangəlmə sidik kisəsində olan qüsur səbəbi ilə dəfələrlə əməliyyat olunan 23 yaşlı kişi xəstə sidik kisəsi nahiyəsində olan ağrı, yandırma, göynəmə şikayətləri ilə Yeni Klinikaya müraciət edib. Sidik kisəsinin ekstrofiyası səbəbindən 2007-ci ildə bir neçə əməliyyat keçirən pasiyent daha sonra 2012-ci ildə sidik kisəsinin ileosistoplastika (nazik bağırsağın bir hissəsinin əlavə edilməsi ilə sidik kisəsinin yenidən formalaşdırılması), Mitrofanov üsulu ilə sistostomiya (sidik ifrazının qarından təmin edilməsi) əməliyyatı olunduğunu bildirib. Müayinə edilmiş pasiyentə “Sidik kisəsinin ekstrofiyasına görə ileosistoplastika əməliyyatından sonrakı vəziyyət, sidik kisəsinin daşları” diaqnozu qoyularaq xəstədə 9 ədəd irihəcmli daş aşkar edilmişdir. Uroloq Dr. Azad Süleymanov, Uzman Dr. Məcid Haqverdiyev və Urologiya şöbəsinin rezidenti Dr. Elmin Xəlilov tərəfindən xəstəyə sistolitotomiya əməliyyatı icra edilərək 9 ədəd irihəcmli daş xaric edilib. Qeyd edək ki, bu patalogiyada sidik kisəsinin ön divarının nazik bağırsaq divarından ibarət olması, sidik kisəsi drenajının təmin edilməsi, əməliyyatdan sonrakı dövrdə baş verəcək ağırlaşmalardan sidik kisəsi-dəri fistulunun yaranması və Mitrofanov üsulu ilə yaradılmış sistostomanın zədələnmə hallarının baş verə bilməsi kimi bir sıra risk ehtimallarının olması mümkündür. Peşəkar komanda tərəfindən icra edilən əməliyyatdan sonra yuxarıda sadalanan ağırlaşmalara rast gəlinmədən pasiyent 4 gün sonra yaşayış yeri üzrə ambulator müalicəyə yazılıb.