XODAŞİRİN CƏBİYEVLƏ MÜSAHİBƏ 12.09.2026 #tarix #müsahibə

Sözün, yaddaşın və insanlığın izində – Xodaşirin Cəbiyevlə görüş. 12 sentyabr 2026-cı il. Masallı şəhəri. Bəzən bir müsahibə sadəcə sual-cavabdan ibarət olmur. Qarşınızdakı insanın həyat yolu, gördüyü işlər, xatirələr və söylədiyi fikirlər sizi keçmişə aparır, unudulmaqda olan insanların həyatına yenidən nəzər salmağa imkan verir. 12 sentyabr 2026-cı ildə Masallı şəhərində yaşayan provizor-təşkilatçı, yazıçı-publisist, jurnalist-tədqiqatçı, tərcüməçi, şair, poliqlot Xodaşirin Oğlan oğlu Cəbiyevin (Cabbari) qonağı oldum və onunla səmimi videomüsahibə apardım. Xodaşirin müəllimin yaradıcılıq fəaliyyəti çoxşaxəlidir. O, uzun illərdir ədəbiyyat, jurnalistika, tədqiqat və tərcüməçilik işləri sahəsində fəaliyyət göstərir. Yaxın günlərdə onun sayca altıncı kitabı – “Həqiqətin güzgüsündə – Rostiəti ovəynədə” adlı şeirlər toplusu işıq üzü görüb. Kitabın Azərbaycan türkcəsi və talış dillərində hazırlanması xüsusilə, diqqətəlayiqdir. Bu münasibətlə baş tutan görüşümüzdə Xodaşirin müəllimin yaradıcılıq yolu, yeni kitabı, poeziyaya münasibəti, eləcə də həyatının müxtəlif mərhələləri haqqında söhbət etdik. Lakin görüşümüzü mənim üçün daha da xüsusi edən başqa bir məqam vardı. Xodaşirin müəllim iyirmi ildən artıq müddətdə 595 saylı Masallı Rayon Mərkəzi Aptekinin müdiri vəzifəsində çalışıb. Bu illər ərzində o, yalnız öz peşə fəaliyyətini yerinə yetirməklə kifayətlənməyib, Böyük Vətən Müharibəsi iştirakçılarına və əlillərinə də xüsusi diqqət və qayğı göstərib, onlara köməklik edib. Bu insanların arasında mənim babam – Fəyyaz Qasım oğlu Fərəcov da olub. Fəyyaz babamın həyat yolunu araşdırdığım, onun haqqında sənədləri, xatirələri və şahidlərin söylədiklərini topladığım bir vaxtda, Xodaşirin müəllimin onunla bağlı xatirələrini dinləmək mənim üçün olduqca qiymətli idi. Çünki tarixi sənədlər bir insanın həyatının müəyyən tərəflərini göstərir. Lakin onu tanıyan insanların xatirələri həmin insanın obrazını tamamlayır. Xodaşirin müəllim müsahibə zamanı Fəyyaz Qasım oğlu Fərəcov haqqında da öz fikirlərini mənimlə bölüşdü, onunla bağlı xatirələrini dilə gətirdi. Mənim üçün bu sözlərin xüsusi mənası var. Çünki illər keçdikcə bir insan haqqında canlı şahidlərin xatirələri daha da qiymətli olur. Məhz belə xatirələr vasitəsilə biz keçmişimizin insanlarını daha yaxından tanıyırıq. Müsahibə zamanı daha bir xüsusi məqam 9 May – Qələbə Günü ilə bağlı idi. Xodaşirin müəllim may ayında birgə hazırladığımız “Qəhrəman insan” adlı kompozisiya haqqında da fikirlərini bildirdi. Bu videoklipin ərsəyə gəlməsi də mənim üçün təsadüfi deyil. Çünki “Qəhrəman insan” anlayışı mənim üçün yalnız müharibə meydanında göstərilən qəhrəmanlıqla məhdudlaşmır. Öz ömrünü xalqına, ailəsinə, Vətəninə və mənəvi dəyərlərə həsr edən insanlar da yaddaşımızda qəhrəman kimi yaşamalıdır. Fəyyaz babamın həyat yolu da bu mənada, məhz belə bir örnəkdir. Xodaşirin müəllimin söylədikləri isə insan yaddaşının daha bir canlı səhifəsidir. Onun yeni kitabı, uzun illər davam edən peşə fəaliyyəti, insanlara göstərdiyi qayğı və keçmişlə bağlı xatirələri bir daha göstərir ki, insanın cəmiyyətdə qoyduğu iz yalnız tutduğu vəzifə və gördüyü işlərlə ölçülmür. Əsl iz insanlara göstərilən münasibətdə, edilən yaxşılıqda və yaddaşlarda yaşanan xatirələrdə qalır. Bu görüşdə mənim məqsədum həm yeni bir kitabın, həm də maraqlı bir ziyalının yaradıcılıq dünyasının tanıdılması idi. Eyni zamanda, illər əvvəl yaşamış insanların xatirələrinin bu günə daşınması baxımından da xüsusi əhəmiyyət daşıyırdı. Xodaşirin müəllimə səmimi söhbətə, xatirələrini bölüşdüyünə və xüsusilə də, babam Fəyyaz Qasım oğlu Fərəcov haqqında dəyərli fikirlərini söylədiyinə görə təşəkkür edirəm! İnanıram ki, belə görüşlər tariximizin, ədəbiyyatımızın və insan yaddaşının qorunmasına xidmət edir. Çünki kitablar sözləri, xatirələr isə insanları yaşadır. Hörmətli izləyiciilər! Buyurun, hazırladığım videomüsahibəni izləyin. Xodaşirin müəllimin yaradıcılığı ilə tanış olun və dəyərli fikirlərinizi bölüşün.