Եթե գազը չսուբսիդավորվի, գալու են շատ վատ օրեր․ տնտեսության համար անվտանգային խնդիր կա

Հայկական գյուղատնտեսությունը հիմա անցնում է լուրջ փորձության միջով։ Ռուսական շուկան փակվում է հայկական արտադրանքի մի ամբողջ շարքի առաջ՝ ծաղկից, լոլիկից ու մրգից մինչև ձուկ և կաթնամթերք։ Սա ծանր հարված է։ Բայց նաև շատ պարզ ախտորոշում։ Տասնամյակներ շարունակ հայկական գյուղատնտեսությունը կառուցվել է մի շուկայի շուրջ, որտեղ մտնելը համեմատաբար հեշտ էր, որակի պահանջները՝ ծանոթ, լոգիստիկան՝ ձևավորված։ Այդ հարմարավետությունն ուներ գին՝ կախվածություն։ Հիմա այդ կախվածության հաշիվն է ներկայացվել։ Կենտրոնական բանկում նույնիսկ ամենածանր սցենարի դեպքում Ռուսաստանի սահմանափակումների հնարավոր ազդեցությունը գնահատել են Հայաստանի ՀՆԱ-ի մինչև 1.8–2 տոկոս։ Բայց առայժմ մենք չենք տեսնում ո՛չ գյուղատնտեսության փլուզում, ո՛չ զանգվածային սոցիալական բողոք։ Կառավարությունը փոխհատուցում է լոգիստիկ ծախսերի մի մասը, նոր խմբաքանակներ գնում են Ուկրաինա, Վրաստան, Մերձավոր Արևելք և Եվրոպա, իսկ Եվրամիությունն արդեն քննարկում է հայկական ապրանքների համար շուկայի լրացուցիչ բացումը։ Հետևաբար, իրական հարցն այսօր Ռուսաստանի սահմանափակումները չեն։ Հարցն այն է՝ Հայաստանը կարո՞ղ է ճգնաժամը վերածել շուկաների փոփոխության։ Որովհետև ռուսական շուկան կորցնելը և եվրոպական շուկա մտնելը նույն գործողության երկու կողմերը չեն։ Եվրոպան պահանջում է ուրիշ ստանդարտ, սերտիֆիկացում, հետագծելիություն, փաթեթավորում, կայուն խմբաքանակ և մրցունակ ինքնարժեք։ Իսկ հայկական ջերմոցն արդեն այսօր աշխատում է թանկ գազով, փոքր մասշտաբով և լոգիստիկ թանկ միջավայրում։ Հենց այստեղ է կառավարության քաղաքականության իրական քննությունը։ 2026–2031 թվականների ծրագրով կառավարությունը խոստանում է գյուղատնտեսության համախառն արտադրանքը մեծացնել առնվազն 50 տոկոսով և կրկնապատկել հայկական ծագման ապրանքների արտահանումը։ Բայց արտադրությունը մեծացնելը հեշտ է գրել ծրագրում։ Դժվարը այդ արտադրանքի համար շուկա կառուցելն է։ Եվ գուցե պատահական չէ, որ նոր կառավարությունը արտաքին գործերի համակարգին տալիս է նաև միջազգային առևտրի գործառույթ։ Եթե այդ փոփոխությունը բովանդակություն ունի, Հայաստանի դեսպանատներն այլևս պետք է ոչ միայն քաղաքական հարաբերություններ կառուցեն, այլ հայկական ծիրանի, գինու, պանրի, ձկան և վերամշակված արտադրանքի համար շուկաներ բացեն։ Ռուսաստանը հայկական գյուղատնտեսության առաջ դուռ է փակում։ Հիմա հարցն այն է՝ Հայաստանի պետությունը քանի՞ նոր դուռ կարող է բացել դրա փոխարեն Սկսենք իրական մասշտաբից։ Ռուսաստանը փուլ առ փուլ սահմանափակել է հայկական ծաղիկների, լոլիկի, վարունգի, պղպեղի, կանաչեղենի, ելակի, ծիրանի, դեղձի, սալորի, խաղողի, կենդանի ձկան, ձկնամթերքի և հիմա արդեն ամբողջ կաթնամթերքի մուտքը: Զրուցել ենք ԱԺ «Ուժեղ Հայաստան» խմբակցության պատգամավոր, ֆերմեր, գյուղատնտես Հարություն Մնացականյանի հետ։ Հետևեք մեզ նաև այլ հարթակներում՝ Website - https://www.1in.am Facebook -   / 1in.am   Instagram -   / 1in.am   Telegram - https://t.me/arajinTV #1inAM #1inTV #news #analysis #լուրեր #վերլուծություն Tel: +374 55305088, +374 77520467, +374 99577211