МИЯЛЫ ШАРУА ҚОЖАЛЫҒЫ | Өтепберген Исламғалиұлы

АТА КӘСІПТІҢ АҚ ЖОЛЫ Қазақтың жылқымен біте қайнасқан тұрмыс-тіршілігі мен ұлттық болмысында жылқы шаруашылығының орны ерекше. Алайда төрт түліктің бабын тауып, шаруашылықты тұрақты жүргізу төзімділік пен тәжірибені талап етеді. Осы жолды өмірлік кәсібіне айналдырып, атадан қалған аманатты жалғастырып келе жатқан жандардың бірі әжібайлық Өтепберген Бекжанов. Бүгінде Әжібай ауылында тұратын еңбек ардагері 2003 жылы «Миялы» шаруа қожалығын құрып, жылқы шаруашылығын дамытуға ден қойды. Өтепберген Исламғалиұлы 1956 жылы 2 қазанда Батыс Қазақстан облысы, Казталов ауданының Әжібай ауылында дүниеге келген. 1975 жылы Бірік орта мектебін бітірген соң тракторшылар даярлайтын курста оқып, 1976–1978 жылдары Кеңес Армиясы қатарында азаматтық борышын өтейді. Еңбек жолын 1978 жылы ХХІV партия съезі атындағы ұжымшарда көмекші жылқышы болып бастаған ол 1979 жылдан бастап аға жылқышы қызметін атқарады. Бұл кәсіп оған таңсық емес еді. Себебі жылқы бағу әулетінің бірнеше буынына жалғасқан.