រំលឹកអនុស្សាវរីយ៍រឿង «នេសាទក្រពើ» មុនថ្ងៃបុណ្យអុំទូក! ទស្សនិកជនសំណូមពរហង្សមាសបញ្ចាំងម្ដងទៀត

មហាជនអ្នកគាំទ្រវិស័យសិល្បៈតាំងពីជំនាន់ឆ្នាំ ២០០០ បានជ្រាបហើយពីភាពល្បីល្បាញរបស់ភាពយន្តខ្មែរខ្នាតធំរឿង «នេសាទក្រពើ» ដែលបានផលិត និង ដឹកនាំរឿងដោយលោក ម៉ៅ អាយុទ្ធ និង បានថតចប់ក្នុងអំឡុងឆ្នាំ ២០០៤ ក្រោមផលិតកម្មរស្មីហង្សមាស។ ភាពយន្តខ្មែរខ្នាតធំ «នេសាទក្រពើ» នេះដែរ បានចេញផ្សាយជាផ្លូវការនៅក្នុងចុងឆ្នាំ ២០០៥ ពោលគឺភាពយន្តនេះ បានចាក់បញ្ចាំងក្នុងរោងភាពយន្តខ្មែរ ដែលទទួលបានការគាំទ្រយ៉ាងខ្លាំងក្លាពីសំណាក់ទស្សនិកជន។ យ៉ាងណាមិញ ចាប់តាំងពីចាក់បញ្ចាំងក្នុងរោងភាពយន្តកាលពីឆ្នាំ ២០០៥ នោះ ភាពយន្តខ្នាតធំ «នេសាទក្រពើ» នេះ គឺពុំត្រូវបានបញ្ចេញលក់ជា DVD ឬចាក់ផ្សាយលើកញ្ចក់ទូរទស្សន៍ ហើយក៏មិនធ្លាប់ឃើញបែកធ្លាយលើបណ្ដាញសង្គម វេបសាយណាមួយឡើយ រយៈពេលជាង ២០ ឆ្នាំកន្លងមកនេះ។ ក្រោយស្ងាត់ការចាក់បញ្ចាំងជាច្រើនឆ្នាំ កាលពីអំឡុងខែ វិច្ចិកា ឆ្នាំ ២០១៦ នារដូវកាលពិធីបុណ្យអុំទូក ផលិតកម្មរស្មីហង្សមាស ក៏ធ្លាប់យកភាពយន្តនេះ មកចាក់បញ្ចាំងឡើងវិញនៅតាមរោងភាពយន្តខ្មែរផងដែរ គ្រាន់តែមិនបានចេញផ្សាយតាមប្រព័ន្ធផ្សព្វផ្សាយផ្សេងៗ។ ដោយឡែក មកដល់ពេលនេះ ទាក់ទងនឹងភាពយន្តខ្មែរខ្នាតធំ «នេសាទក្រពើ» នៅតែធ្វើឱ្យមហាជនអ្នកគាំទ្រភាពយន្តខ្មែរជាច្រើនដែលពុំទាន់បានទស្សនា មានការចែករំលែកវែកញែកដោយមិនអស់ចិត្តជុំវិញភាពយន្តមួយនេះជាបន្តបន្ទាប់ ខណៈចង់ឱ្យផលិតកម្មបញ្ចេញភាពយន្តនេះ ចាក់បញ្ចាំងជាថ្មីម្ដងទៀត។ ជាក់ស្ដែង ថ្មីៗនេះ ស្របពេលចូលដល់រដូវកាលពិធីបុណ្យអុំទូកឆ្នាំនេះ មហាជនអ្នកគាំទ្រលើបណ្ដាញសង្គមកំពុងផ្ទុះការចែករំលែកជាថ្មី នឹកដល់ភាពយន្ត «នេសាទក្រពើ» ដែលធ្លាប់ចាក់បញ្ចាំងក្នុងថ្ងៃពិធីបុណ្យកាលពីជាង ១០ ឆ្នាំមុន ដោយមហាជនភាគច្រើនបញ្ចេញមតិចង់ឱ្យផលិតកម្មរស្មីហង្សមាសចាក់បញ្ចាំងភាពយន្តនេះជាថ្មីម្ដងទៀត ដើម្បីឱ្យអ្នកមិនទាន់បានទស្សនា អាចមានឱកាសបានទស្សនា៕ #NesatKropeu #រឿងនេសាទក្រពើ #HangMeas #BrangKropeu #BonOmTeuk #បុណ្យអុំទូក #KhmerThmey #រឿងខ្មែរបុរាណ #KhmerMovie