الأعراس أيام زمان .. كيف تعبى البيت ضيوف

أعراس أيام زمان: الزمن الجميل.. لا صالات ولا "بريستيج"! 🎊 ​على أيام زمان، لا كان في صالات ولا حفلات "مودرن" بسبع نجوم.. كانت القصة أبسط وأهضم بكتير! 🏚️✨ ​🤵 طلة العروس البهية ​كان العريس ينتظر جيّة العروس بوسط أرض الديار أو الغرفة الكبيرة على كنباية، أو "منصبة" خشبية مرتفعة، وحواليهم صفين كراسي يمين وشمال، تقول ممر شرفي للاعبي ريال مدريد! ⚽😂 ​وشوية وبتوصل العروس وهو عم يشلف بنظراته يمين وشمال، والخجل آكله أكل، وأمه وراه نازلة فيه بخ بالعطر، تقول قطعة حلاوة جبن طالعة من القطر وعم تلمع لمع! 🍬✨ ​👰 بروتوكول العروس ​بتقعد العروس متل اللعبة، وجهها مطلي بالبودرة تقول دهان بيت جديد، والخدود حمر عم يلهلبوا متل الجمر.. وشعرها متل نجوم درب التبانة عم يلمع لمع من كتر "البرق" والشامبو، ومثبتة الطرحة بـ مية دبوس، ومن كتر ما شادة حالها وخايفة تتحرك، حاسة حالها لوحة جدارية بالمتحف الوطني! 🖼️😂 ​🎵 السلطنة والرقص ​أما الأغاني، فكان الكاسيت المجمّع وصوت "الستيريو" هو سيد الموقف، والصوت بيلعلع بالحارة كلها.. والصبايا بوسط الغرفة نازلين رقص "هزي يا نواعم"، والنسوان عم يزغردوا "آويها" من قلب ورب! 💃🎶 ​🕺💃 رقصة "السلو" والتصوير "العمياني" ​وبعدين بتجي الفقرة الحاسمة، لما يقوم العريس والعروس ليرقصوا مع بعض.. العريس ماسك العروس من أطراف أصابعه كأنه خايف يكسرها، والعروس ماشية على بيض مشان ما تفركش بفستانها! 🥚 ​والكل محاوطهم وعم يبخ عليهم "سبراي" الثلج والورد اللي بيلزق بالشعر.. وهون ببلش "الأكشن" مع صور الكاميرا القديمة اللي إلها فلاش أبيض "بيعمي العيون تعمية"! والتصوير شغال "طق طق"، وكل ما يطق فلاش، العريس والعروس يغمضوا عيونهم لا شعورياً ويطلعوا بالصورة كأنهم مغمى عليهم من الخجل والتعريق والعجقة! 📸💥🥵 ​🍰 هجوم الكاتو (المعركة الكبرى) ​ووقت تطلع صواني الكاتو، استنفروا الولاد وصار الهجوم الانتحاري! 🏃‍♂️ كيك وكولا بكل مكان.. هاد اللي ماسح الكريمة ببنطلونه، وهاد اللي عم ينقّط على السجاد، وهاد اللي أكل كتير وراجع! 🤮 ​وأمهاتهم نازلين فيهم : "انقبر اقعد.. فضحتنا! بس نروح على البيت بتشوف"، وهنّن ولا همّهم، فاتحين جبهة قتال على الكاتو والملبس! 🍬👊 ​💍 دراما التلبيسة ​ولما يجي وقت "التلبيسة"، بتلاقي العريس عرقان ومرتبك، وعم يحاول يلبّس العروس المحبس وإيده عم ترجف، والعروس عم تدفشه بكل قوتها لحتى يدخل بإصبعه! 💍 والنسوان عم يرقبوا "المحبس فات ولا ضيق؟" مع تقدير فوري لوزن وسعر الخاتم بنظرة وحدة! وأم العريس نازلة زغاريد بآذانهم من الفرحة! 📣 ​💥 البهارات الختامية (المشكلة) ​وقبل ما تخلص السهرة، لازم تصير "المشكلة" التقليدية.. إما أخت العريس زعلت من القعدة، أو خالة العروس شالت شناتيها وبدها تمشي لأنهم نسيووا يضيفوها! وبتبلش "المجاكرة" بالهلاهل واللطش بالحكي، وما بيفضّوا السيرة إلا بطلعة العرسان! 🤐🔥 ​🚗 ماراثون (الزفة) ​ويا عيني على وقت "الزفة".. هون بتبلش معركة "حجز السيارات"! والقرار القطعي اللي ما فيه مناقشة: أم العريس وأم العروس محجوز مكانهم بسيارة العرسان وما حدا بسترجي يفتح تمه! وحدة قاعدة قدام وعم توزع نظرات انتصار، والتانية ورا جنب العروس عم تظبط الطرحة.. وباقي القرايب بينحصروا بالسيارات القديمة، تلاتة ورا وتلاتة فوق بعض.. والسيارات ماشية ونازلين زمامير "طاط طييت" لتعرف الحارة كلها إنه العرسان طلعوا! 🚗💨🎉 عالهامش👇🏻 كان يُغنّى في العرس على نغم🥁 .. يم عيون الدبلاني وجفن النعسان رموش عيونك خلقاني لدبح الانسان💥 شوفا تتمشى بزقاق البوس يطعمني الله وشوفك عروس واخواتك عشرة يصيروا عرسان💥 يم عيون الدبلاني ..... شوفا بزقاقك شهلا تقبر اهلا امها عما تندهلا ﻭﻣﺎﻭ هون سمعان💥 ولما نزلت عالمسرح حتى تفرح بغمزة من طرف عينا جنوا العرسان💥 نزلت من حارة الصخرا عا بيت ايوب لقاها ببوز الحارﺓ احمد رضوان💥 رحنا عاحارة الخندق نقطف يبرق لحقوها ولاد الدغري وقفلوا الدكان💥 فاتت في حارة المسلوب قبل الغروب ضوت الحارا كلها ﺑﺄربع تركان 💥 الحلوي عا حارة الصخرا ما ﺍرفع خصرا الهوا خربطلا شعرا ﻭﻻﺡ الفسطان💥 شفتا بحارة الزيتوني زاغوا عيوني علوا تكوني سكافي وانا السدان 💥 شوفا بحارة خردوقة هالمعيوقة ﻧﻴﺎﻻ ما ﺍحلا زوقا بلم الشبان 💥 والسهرة حتى الصبح العالم مبسوطة 😇💯🥁 مسيناكم🧉🙋‍♂️