CÁCH CHẾ BIẾN RAU BẾP LÁ GIÀ CỦA NGƯỜI M'NÔNG GAR trên Tông tông, Drư̆ng yang, Drư̆ng ñim khư̆t.

GÂM PAI BIÊP N’HUA Pai biêp ta nêh M’Nông Gar gô̆ ƀôn Jri Yŭk yâu, dâ̆ng er jêng kuôl năn ƀôn Liêng Keh, să Dak Phơi kheh geh bar pai gâm eh, hên eh geh pai biêp ng’sei lâp pai biên n’hua. Lăp pai biêp n’hua ho bâ̆n găm klah iêu: Bâ̆n sŏk n’hua biêp, bâ̆n r’hôč n’ha eh, ndroh lat lĕ ng’kông lâp jriêng eh. Lĕ bâ̆n r’hôč pai biêp hân, bâ̆n sak weh phei. N’ha biêp lai r’hôč lĕ rô, bâ̆n tôh măng r’pal, tôh phei du băl ên, jêh ên bâ̆n bok. Bâ̆n bok n’hua biêp lăm eh lik r’pič, hên ma ndei bok. Bâ̆n sŏk pai biêp jêh bok lik ăn măng mang, pai biêp n’hua jêh bok eh krip tlâm lâm, hăn bâ̆n têh ăn eh rai, r’hin. Lĕ rô bâ̆n têh pai, bâ̆n rum ing eh sa rô, bâ̆n ăn dak pai măng bung n’hăk, lơi dak eh dôh, eh r’gič ruk khuk, bâ̆n tôh pai biêp măng en. Bâ̆n sŏk r’nai, wâr pai măng dlah eh ƀañ ƀañ, un ăn eh krip bât dlah. Jêh en bâ̆n găm lơi eh sưn trôih 10 m’nĭt, bâ̆n čĕ boh, bot ngot, ăn tiêt eh di dơk bâ̆n sa, trôih lai kah bâ̆n tong hăn un rô wêh čĕ. Di bâ̆n geh pôč čĭ, kư̆t, ka hăn čĕ măng en. Bâ̆n wêh lơi măng n’hăk trôih 10 m’nĭt hăn dơi hơk sa pai rô. Nêh khơñ sa mrĕ, bâ̆n bok mrĕ čĕ du băl, di bâ̆n so khơñ sa mrĕ hăn bâ̆n sa lun klah en eh kah ya. Di so bâ̆n geh pôč čĭ, kư̆t, ka nai, hăn bân čĕ dak sư̆r um măng en, sa eh kah ya. Ăñ lĕ mơng sa klah en rô. Hui pang yo, mei bap, kôñ tlâu bâ̆n yâu đo tơih ngơi: yâu đo so geh boh, bot ngot nai klah dâ̆ng êr, prei sŏk n’ha r’ñao m’hă jêng bot ngot, sŏk bi buh ing m’hă boh, čĕ mrĕ Gar bâ̆n măng ên, lăm eh tiêt, hăn ma bâ̆n sa noh ngăn kah dơk tong./.