Қалай жұмыс істейміз? Зумерлерге қатысты сын көбейді

Елімізде зумерлердің жұмысына қатысты сын көбейді. Барлығы емес, әрине. Бірақ дәл осы буындағы, яғни 2000-жылдардан кейін өмірге келген қыз-жігіттер жұмысқа себепсіз келмей, басшының қоңырауына жауап бермейді деген секілді шағым әлеуметтік желіде жиілеген. Тіпті жұмыс берушілердің көбі қазіргі жастармен қалай тіл табысарымызды да білмейміз деп отыр. Дәл осы Z буынындағы адамдардың жұмысқа деген көзқарасы қандай? Психологтар не дейді? Абай Нұржанұлы анықтап көрген еді. АБАЙ НҰРЖАНҰЛЫ, тілші: Міне, дәл осылай жұмыс уақытында себепсіз басшысының телефонын көтермей, жеке шаруасын бітіріп жүретін қызметкерлер соңғы уақытта көбейді дейді жұмыс берушілер. Айтуларынша әсіресе зумерлердің көбінде жауапкершілік жоқ. Тіпті тапсырманы да тиянақты орындамайды деп шағымданады. Мейрамхананың иесі Айдана Мұратбек те қазір жұмысшы қабылдағанда көп қиындыққа кезігетінін айтады. Мәселен 18-25 жас аралығындағы қыз-жігіттер алғашқы бір-екі күн өз ісін атқарып жүріп, кейін ұшты-күйлі жоғалады дейді. Телефон көтермейді, жұмысқа келмейді екен. Одан қалды себебін де түсіндірмейді деп күйінеді. АЙДАНА МҰРАТБЕК, мейрамхана иесі Бүгіннен бастап жұмыс істеймін деп кешке дейін отырады да, ертесіне жоқ болады ғой. Көбіне ол бізде 2000-нан жоғары, жаңағы зумерлер деп айтамыз ғой солар. Ертесіне телефонды алмайды, одан кейін қайтып іздейсің. Олар болмаса біздің жұмысымыз жүрмейді. Сондықтан мен бұл кісілерді түсінбедім. Біздің жасымызда жауапкершілік болған. 2000 жылдардан бері дүниеге келген жандарды Z буынына жатқызады. Бұл жастағы қыз-жігіттерді ата-анасы еркін өмір сүруге тәрбиелеген дейді психологтар. Яғни олар қандай жағдайда да өздеріне қолайлы ортаны таңдайды. Бірақ кейбірі еркіндік пен жауапкершілік ұғымдарын дұрыс түсінбегендіктен, жұмысқа жеңіл қарайды деген пікірде. ГҮЛДАНА БАБАОМАРОВА, Қызылорда облыстық психологиялық қолдау орталығының маманы: Жұмыс біздің бір басты құндылығымыз болып кеткен. Ал бірақ зумерлер үшін жұмыс өмірінің тек бір бөлігі. Барлығы жауапкершіліксіз деп айта алмаймын. Бірақ қоғамның талқылауы бекер емес шығар деп ойлаймын. Енді бұл жерде адамның жеке өзіне де қатысты болады. Салғырт қарау бұл кішкене еркіндік пен жауапкершіліктің ара жігін ажырата алмай қалған тұлғаларда кезігуі мүмкін. Яғни Z буынындағы адамдардың барлығы бірдей емес. Тіпті олардың еркіндігін артықшылығы ретінде қолданған дұрыс дейді мамандар. Ең бастысы, кез келген адам өз ісінің қоғам өміріне маңызы зор екенін түсінуі тиіс екен. #Информбюро #31арна #БастыЖаңалықтар #Новости #31канал