Dalibar Makaranta A Hannun Yan-ta’adda

A watan Nuwamban 2025, 'yan ta'adda sun kai hari a Makarantar Sakandaren 'Yan Mata ta Gwamnati da ke Maga, a Jihar Kebbi, da sanyin safiya, inda suka sace dalibai mata 25. Wannan harin ya kara jaddada matsalar sace-sacen dalibai daga makarantu da ke ci gaba da yawaita a yankin Arewacin Najeriya, inda makarantu ke zama abin hari ga kungiyoyin masu dauke da makamai. Duk da cewa 'yan matan sun dawo gida bayan kwana tara, lamarin ya bar musu abubuwan tunawa da ba za su taba mantawa da su ba, wadanda suka wuce lokacin da suka shafe a hannun masu garkuwar. A cikin wannan shirin na #BIRBISHINRIKICI, za mu ba da labarin daya daga cikin 'yan matan, Salima Sani, da kuma kwanakin da dukkan su suka shafe a hannun masu garkuwar.