ოკუპაციური თერაპია | ნეიროგანვითარების ცენტრი

ოკუპაციური თერაპია, პიროვნებაზე ცენტრირებული პროფესიაა, რომელიც ხელს უწყობს განსხვავებული შესაძლებლობების მქონე პირებს ანდა მოწყვლად ჯგუფებს, ჩაებან მათთვის მნიშვნელოვან საქმიანობებში და მოახდინონ საკუთარი თავის რეალიზება. ამ მიზანს, ოკუპაციური თერაპევტები, ერთი მხრივ, პიროვნების უნარების გაუმჯობესების ხელშეწყობით, ხოლო მეორე მხრივ, გარემოსა და საქმიანობის ადაპტაციის გზით აღწევენ, რათა საბოლოოდ ადამიანმა მისთვის საჭირო და სასურველი ყოველდღიური აქტივობების შესრულება და დამოუკიდებლად ფუნქციონირება შეძლოს. (World Federation of Occupational Therapists, 2012) 2016 წლის 8-9 დეკემებერს, ივანე ჯავახიშვილის სახელობის სახელმწიფო უნივერსიტეტმა და საქართველოს ოკუპაციურ თერაპევტთა ასოციაციამ კავკასიის ქვეყნების ოკუპაციურ თერაპევტთა III საერთაშორისო კონფერენციას უმასპინძლა. კონფერენციაში მონაწილეობდნენ საქართველოში, სომხეთსა და აზერბაიჯანში მოღვაწე ოკუპაციური თერაპევტები, ასევე მოწვეული სტუმრები ესპანეთიდან და ჰოლანდიიდან. კონფერენციას ესწრებოდნენ ადგილობრივი და საერთაშორისო სამთავრობო და არასამთავრობო ორგანიზაციები და მომიჯნავე დარგის სპეციალისტები. კონფერენციის ძირითადი მიზანს სხვადასხვა ქვეყნის გამოცდილებათა გაანალიზების ფონზე ოკუპაციური თერაპიის სწავლების ათწლიანი გამოცდილების შეფასება წარმოადგენდა, ასევე, საერთაშორისო პროექტების ინიცირება და რეგიონში ოკუპაციური თერაპიის ცნობადობის დონის ამაღლება. მთავარი მომხსენებელი ვიკის უნივერსიტეტის (ესპანეთი) პროფესორი სალვადორ სიმო ალგადო გახლდათ, რომლის მოხსენების თემა იყო: "ოკუპაციური თერაპევტების პროფესიული იდენტობა: განათლების, კვლევისა და ინტერვენციის ინტეგრირება". ვიდეოში იხილავთ: ☑ როგორ მუშაობენ ოკუპაციური თერაპევტები სხვადასხვა საჭიროების მქონე ბავშვებთან; ☑ რა როლს ასრულებს ოკუპაციური თერაპია ჯანდაცვის თანამედროვე სისტემაში. მოხარულები ვართ გაცნობოთ, რომ ოკუპაციური თერაპიის პროფესიის საქართველოში ჩამოყალიბება ჩვენს ცენტრთან აქტიური თანამშრომლობით განხორციელდა. 1996-2000 წლებში ნეიროგანვითარების ცენტრმა საქართველოში ინიციატივა აიღო, დაენერგა მულტიდისციპლინური გუნდური მიდგომა შეზღუდული შესაძლებლობის მქონე ბავშვთა რეაბილიტაციის პროცესში. ამ მცდელობამ ნათელი გახადა გუნდში ოკუპაციური თერაპევტის არსებობის აუცილებლობა. აშშ-ისა და ევროპის ქვეყნების უმრავლესობაში ოკუპაციური თერაპია ერთ-ერთ ყველაზე სწრაფად განვითარებად სარეაბილიტაციო პროფესიას წარმოადგენს. 2001 წლიდან ჩვენმა ცენტრმა ევროპის ოკუპაციურ თერაპევტთა უმაღლესი განათლების ქსელის დახმარებით და თანამშრომლობით დაიწყო პირველი საგანმანათლებლო (სასწავლო) კურსი ოკუპაციურ თერაპიაში. კურსში სახელწოდებით "ოკუპაციური თერაპიის დანერგვა საქართველოში" პროექტში მონაწილეობდა 11 სტუდენტი, რომელთაც მიღებული ჰქონდათ ფსიქოლოგის, ექიმის და პედაგოგის განათლება. განათლების პროცესში ჩატარდა მრავალი სემინარი, შეხვედრა, ტრენინგი და განხორციელდა არაერთი პრაქტიკული სამუშაო ოკუპაციური თერაპიის ქართველ სტუდენტთა და ადგილობრივ თუ საერთაშორისო მოსაზღვრე სფეროების პროფესიონალთა შორის თანამშრომლობით. ნეიროგანვითარების ცენტრის ოკუპაციური თერაპევტები: • სალომე ბარბაქაძე • თეონა დარჩია • თაკო ჩინჩალაძე • ნათია ოთარაშვილი • მარიამ ივანიძე ნეიროგანვითარების ცენტრი - Neurodevelopment Center ✆ +995 (32) 252 78 89 💻 www.NDC.ge