გრიფით საიდუმლო არაბული ქალაქები

როგორც კი თბილისს გასცდებით, რუსთავისკენ მიმავალი მაგისტრალის მარცხენა მხარეს, მტკვრის ჭალების ძლივს გადარჩენილი კუნძულია. მას ამჟამად კრწანისის ტყე-პარკი ეწოდება, მაგრამ მომავალში არაბული ქალაქი Tbilisi Waterfront გახდება - თბილისი წყლის პირას. ახალი ქალაქისთვის გათვალისწინებული 590 ჰექტარი მთლიანად შთანთქავს კრწანისის ტყეპარკს. მეორე არაბული ქალაქი, სადაც ცხოვრება მოჰამედ ალ ალაბარის მოლოდინით მოუნდებათ ადამიანებს არაბეთის გაერთიანებული საამიროებიდან, გონიოში შენდება, ჭოროხის დელტაში. გარემოსდაცვითი თვალსაზრისით ამ მიწის მნიშვნელობა კრწანისის ტყეპარკთან შედარებით განუზომლად დიდია. ჭოროხის დელტა ზურმუხტის ქსელის ერთ ერთი საიტია. ზურმუხტის ქსელი ევროპის ველური ბუნებისა და ბუნებრივი ჰაბიტატების დაცვის მთავარი მექანიზმია. ცოტა ხნის წინ ცნობილი გახდა, რომ ჯერ კიდევ მარტში გამოქვეყნდა „ქართული ოცნების“ მთავრობის განკარგულება, რომლის თანახმადაც ზურმუხტის ქსელის საზღვრები დაკორექტირდება არაბული საინვესტიციო პროექტის საჭიროებებიდან გამომდინარე. „ზღვისპირა ფუფუნება“ - ასე იწყება სარეკლამო ბროშურა, რომელიც 260 ჰექტარზე გადაჭიმული „გონიო იახტკლუბისა და ნავსადგურის“ შესახებ გვიყვება. დასახლებაზე, რომელიც ნავმისადგომის, მრავალსართულიანი კორპუსების, მდიდრული ვილებისა და სასტუმროებისგან შედგება.