Гулгашти Сайёҳи Боғи Хайём

Душанбе — шаҳри сабзу хуррам ва макони боғу гулгаштҳои зебоест, ки барои сокинону меҳмонон имкони фароғату сайру гашт фароҳам меорад. Яке аз чунин мавзеъҳои дилнишин Боғи фарҳангиву фароғатии ба номи Умари Хайём аст. Ҳар рӯз сокинону меҳмонони пойтахт ба ин ҷо меоянд, то дар фазои орому осуда истироҳат намуда, аз табиати зебо ва имкониятҳои фароғатии он баҳра баранд. Зебоии чунин мавзеъҳо аз баракати сулҳу субот ва осоиштагӣ боз ҳам бештар эҳсос мешавад. Дар остонаи таҷлили 35-солагии Истиқлоли давлатии Ҷумҳурии Тоҷикистон, ободонии шаҳр ва фароҳам овардани шароити муносиб барои истироҳату фароғати мардум аз дастовардҳои муҳими даврони соҳибистиқлолӣ ба шумор меравад. Зебоии ҳар боғ пеш аз ҳама аз сабзаву хуррамии он оғоз меёбад. Дар Боғи фарҳангиву фароғатии Хайём низ гулу буттаҳои ороишӣ ва дарахтони сабз фазои боғро боз ҳам дилнишин месозанд. Нигоҳубини пайвастаи гулу буттаҳо, обёрӣ ва парвариши дарахтон аз ҷумлаи корҳои муҳиме мебошанд, ки барои ҳифзи намои зебои боғ анҷом дода мешаванд. Ҳар гӯшаи сабзи он заҳмати кормандон ва ғамхории онҳоро ба табиат инъикос мекунад. Барои нигоҳ доштани таровату тозагӣ ва ҳусни саҳни боғ, ҳар рӯз субҳу шом бо истифода аз мошинҳои махсуси обпошӣ роҳраву саҳни он обёрӣ карда мешавад. Ин тадбир на танҳо ба тозаву озода нигоҳ доштани муҳити боғ мусоидат мекунад, балки барои нигоҳ доштани ҳавои салқин ва фазои гуворои он низ замина фароҳам меорад. Ин ҷо на танҳо макони истироҳати инсон, балки гӯшае барои эҳсоси наздикӣ ба табиат ва зебоиҳои он аст. Боғи фарҳангиву фароғатии Хайём барои дӯстдорони фароғати фаъол низ имкониятҳои гуногун фароҳам овардааст. Аттраксионҳои гуногун дар ин ҷо барои кӯдакону наврасон ва калонсолон лаҳзаҳои пурнишоту хотирмон эҷод мекунанд. Аз ҷумла, «Чархи паром» яке аз аттраксионҳои маъруфи боғ буда, аз баландӣ манзараи зебои атрофро тамошо кардан имконпазир аст. Барои дӯстдорони ҳаяҷону суръат бошад, «Юпитер», «Киштии роҳзан», «Американски горки ва «Бурҷи афтиши озод» аз ҷумлаи аттраксионҳои ҷолиби боғ ба шумор мераванд. Ҳар кадоми онҳо таҷрибаи гуногуни фароғатиро пешниҳод мекунанд. Фурсати муносибро аз даст надода, аз аттраксионҳои гуногуни боғ истифода бурдем ва аз ин сайри форам таассуроти амиқу фаромӯшнашаванда бардоштем. Барои кӯдакони хурдсол низ аттраксионҳои махсус мавҷуданд, ки ба синну соли онҳо мутобиқ буда, муҳити шавқовару хотирмон фароҳам меоранд. Ҳамин гуногунрангии имкониятҳои фароғатӣ Боғи Хайёмро ба маконе табдил додааст, ки ҳар як меҳмон метавонад мувофиқи завқу хоҳиши худ лаҳзаҳои хушу хотирмонро паси сар кунад. Маркази дилхушии кӯдаконаи «Шукрона» ба як макони ҳақиқии шодиву нишоти кӯдакону наврасон бадал гаштааст. Ин ҷо бо лағжандаҳои гуногун, арғунчакҳо, батут ва пайроҳаҳои тӯрии кӯҳнавардӣ муҷаҳҳаз буда, барои бозиҳои фаъоли кӯдакон ҳама шароитро муҳайё сохтааст. Сатҳи майдонча бо пӯшиши мулоими резинӣ фаро гирифта шудааст, ки бехатарии пӯрраи кӯдаконро ҳангоми бозӣ таъмин менамояд. Ҳамчунин, дарахтони ороишии гулобӣ ва нишастгоҳҳои овезони муосир ба ин макон зебоии хос бахшида, барои волидону кӯдакон минтақаи аълои аксбардориро фароҳам овардаанд. Маркази воқеияти виртуалии «VR DOM», ки дар Боғи фарҳангу фароғатии Хайём ҷойгир аст, дарҳои худро ба олами афсонавии технологияҳои муосир мекушояд. Ин ҷо бо айнакҳои VR, симуляторҳои ҳаракаткунанда ва синамои 9D муҷаҳҳаз буда, ба ҳар як бинанда ҳисси воқеии парвоз, саёҳат ба фазо ва ҳаяҷони беандозаро эҳдо мекунад. Маркази мазкур ҳам барои кӯдакон ва ҳам барои калонсолоне, ки хоҳони таҷрибаи наву фаромӯшнашавандаанд, интихоби беҳтарин аст.