TƏKRAR QARĞIDALI ƏKİNİ APARILIR

Bölgələrdə taxıl biçini bir aydan çoxdur başa çatıb. Fermerlər torpaqdan daha səmərəli istifadə etmək üçün payızlıq əkinlərə qədər öz sahələrində təkrar qarğıdalı əkini aparırlar. Bir il ərzində sahələrdə taxıl və qarğıdalının növbəli əkilməsi torpağın strukturunu yaxşlaşdırmaqla yanaşı, fermerlərin gəlirlərini də ikiqat artırmış olur. Təkrar qarğıdalı əkini bu bitkinin əkilməsi üçün münasib olan və suvarılan ərazilərdə aparılır. Bu il Göyçay rayonunda da 250 hektar sahədə təkrar qarğıdalı əkini aparılıb. Dövlət taxıl biçini ilə yeni əkin dövrü arasında olan 6 aylıq müddətdə torpaqlardan səmərəli istifadə olunması üçün təkrar qarğıdalı əkinlərinin aparılmasını dəstəkləyir. Nazirlər Kabinetinin müvafiq qərarına əsasən, təkrar qarğıdalı əkini aparan fermerlərin toxuma olan tələbatını ödəmək məqsədilə onlara hər hektara görə 60 manat birdəfəlik vəsait ödəniləcək. Qeyd edək ki, bu il Azərbaycanın 41 rayonunda və Aqrar Elm və İnnovasiya Mərkəzinin təsərrüfatlarında taxıl biçinindən sonra təkrar qarğıdalı əkini aparılıb. Təkrar qarğıdalı əkini sahələrinin ümumi sahəsi 41 min hektara yaxındır. Ən çox əkin Tovuz rayonunda qeydə alınıb - 5348 hektar.