ШҚО-дағы Қоңыр әулие үңгіріне жыл сайын 10 мыңға жуық адам зиярат етеді

Шығыс Қазақстан облысында «Рухани жаңғыру» бағдарламасын жүзеге асыру үшін 28 млрд теңгеден астам қаражат бөлінеді. Бұл сома өңірде музей салу, киелі жерлердегі инфрақұрылымды дамыту, археологиялық қазба жұмыстарын жүргізу, көне жәдігерлерді іздеу сияқты игілікті істерге жұмсалмақ. «Нұр Отан» партиясы Төрағасының бірінші орынбасары Шығыс Қазақстан облысына сапарында тамыры тереңге жайылған тарихи-мәдени орындарды аралады. Мұхтар Құл-Мұхаммедтің ойынша, таяу уақытта бұл жерлерге келетін туристер саны да айтарлықтай артады. Шығыстағы киелі орындар жетерлік. Солардың бірі әрі бірегейі – Ақтас тауындағы Қоңыр әулие үңгірі. Жылына 10 мыңға жуық саяхатшы мен зияратшы келетін жер «Абай жолы» романында да көрініс тапқан. Қоңыр әулие үңгірі ел арасында тарихи аңыздарымен және емдік қасиетке ие суымен белгілі.