Güney Özdemir - Mehrîcana Netewî #güneyözdemir #Mehrîcananetewî

Helbest: Gernas Koçer Xwendin: Güney Özdemir Tembûr: Muhlis Berberoĝlu MIHRÎCANA NETEWÎ Nazdara ser bixêlî Dilbera bejin zirav Şoxa gerden bi kêlî Reşrihana ta belav Çavên te ne ji rengê Kevanê Rostemê Zal Heybet digrin li hember Iskender û Hanîbal Awirên te ji tîr û Xedengên Xanşeref in Li dilê evîndaran Armanc û xweş hedef in Sing û ber û bedenên Te tev ji nexşê Manî Kaniya xeyalên te Ji derya şêxê Xanî Her xemzeyek çavê te Himberê hezar tîrî Dîdara te dinasim Ji helbestên Cizîrî Cîhan ji heybeta te Ket nav tirs û gumanan Li çar hêlan tu bûyî Destana ser zimanan Yên ku xemla te dîtin Ketin ricf û welwelê Bilindtire bejna te Ji ya Siwaraxelê Li bedenê Zagrozan Bi hezarê salan e Singê te qada ceng e Her êrîş û talan e Ji bona evîna te Me hesin sarî badan Bipirse ji Turan û Ji Asûr û Aqadan Ji bo bejn û bala te Li vê xakê bê guman Me gelekî singê hev Daye ber şûr û riman Tenê dîrok zane me Çi aniye serê hev Çi bêjim têrê nake ne bi roj û ne bi şev Ger me jî nebûna ev Çiyayên berz û asê Em dibûne kezaxa Ber devê şûr û dasê Li hemberî êrîş û Hem tofan û bahozan Kurdan pişta xwe dane Van çiya û Zagrozan Hê Babîlî jî nebûn warê me bû ev welat Me lê ava kirine Sera û birc û kelat Binêre li berheman Hem li nexş û hûneran Bipirse ji Asûran Ji Aqad û Sûmeran Wê ji te re bibêjin bê tirs û şerm û fedî Kî ne Gotî û Kardox Kî ne Mîtan û Medî Ew bûne her siwarên Pişta kihêl û hespan Her ew bûne rimbazên jîr û çeleng û çespan Bêjimar pêlewan û Gelek leheng û rimbaz Gelek jîr û zana û Xoşewist û şengenaz Ji eşq û evîna te Şewitîn bûne rijî Stêra te her dem geş e Ti carî naxurijî Singê me de çikiyan Tîr û rim û şûr û kêr Lê ji pêta agirê Eşqa te em nebûn têr Bibe mêvan rojekê Tu li koçka dilê min Derman bike birînan Êş û jan û kulê min Milyon ji ber awirên Wan çavên te qewitîn Bê jimar ji agirê Evîna te şewitîn Bêje,dilê min bêje Ev çi husn û cemal e Ev çi dirr û mircan e Çi bazin û xirxal e Çi baxê erxewan e Ev çi xemla heft reng e Ev çi zerî û naz e Ev çi şepal û şeng e Ev çi berq û birûsk e Herdemî geş û hil e Ev çi awirweşîn e Dilberek çav bikl e Qamişlo û Mahabad Digel Amed û Hewlêr Ketine cezb û semê Bo te şoxa Kemberzêr Herkes divê himbêz ke Ewê bejn û bala te Her kes divê ramûs e Wê nîşan û xala te Li burca evîna xwe Carkê min bihewîne Evan dax û birînan Dermanke bikewîne Bi kovana sedsalan Em jî te himbêz bikin Bi sed nexş û nigaran Timtêla te xêz bikin Li cîhanê tu tenê Bi min re dost û yar be. Bila çerxa gerdûnê Li himber min neyar be Were dilber de bes e Bide min soz û peyman Dê ji bote avakim Sera û birc û eywan Ezê taca Keyxosrev Danim li ser serê te Wê artêşa Kardoxan Rêz be li hemberê te Wê ji dêmên te birjin şewq û tîrêjên tavê Heft iqlîm wê ji te re bigrin rêz û silavê Ciwan ji evîna te Wê bibin agir û pêt Pêlên eşqê wê bavên Her çar aliyên welêt Hîvî me ev rist û bend Qet neçin li ber bayê Ev sûrperî carekê Bi min re were rayê Ûbeydullahê Nehrî Şêxse'îd û Bedirxan Hem Simkoyê Şikakî Hem seydayê li Barzan Pêşewa û Qasimlo Seyyid Rizo 'Elî şêr Bihezaran leheng û Bazên çeleng û dilêr Li bendê ne em bêjin Sed mizgînî ji we re Mihrîcana netewî Li Kurdistan digere Bila rih û mergê we Her demî şad û geş be Ronahîbe gora we şewq û Şemal û xweş be 24.12.22 Gernas Koçer #güneyözdemir #Mehrîcananetewî #helbest #şiir #kurdî #gernaskoçer #helbestakurdî