ആനപ്പെരുമയിൽ കോന്നി | Elephant Museum Konni | Eco Tourism | Kerala | Kaumudy

പത്തനംതിട്ട: രാജ്യത്തെ ആദ്യത്തെ ആന മ്യൂസിയമായ കോന്നി ആനത്താവളത്തിൽ സന്ദർശകരുടെ തിരക്ക്. ആനത്താവളത്തിൽ ഇതുവരെ ആനക്കുറുമ്പ് കണ്ട് കൗതുകം കൊണ്ടവർക്ക് ഇനി ആനകളുടെ മനസും ശരീരവും കാണാം. ഭക്ഷണ ശീലങ്ങളറിയാം. ആന അറിവുകളുടെ അപാര കാഴ്ചകളുണ്ട് മ്യൂസിയത്തിൽ. ആനയുടെ പൂർവികർ തൊട്ടുള്ള പരിണാമത്തിന്റെ ഒാരോ ഘട്ടങ്ങളും പ്രദർശിപ്പിച്ചിട്ടുണ്ട്. പ്രകൃതിയോടും മനുഷ്യരോടും പക്ഷികളോടും കാട്ടിലെ മറ്റ് മൃഗങ്ങളോടുമുള്ള ആന മനസ് എങ്ങനെയെന്നും ചിത്രങ്ങൾ പറഞ്ഞു തരുന്നു. അങ്ങനെ ആകെയൊരു ആനച്ചന്തമാണ് കോന്നിയിലെ മ്യൂസിയത്തിന്. ആനകളെക്കുറിച്ചുള്ള ആർട്ട് ഗ്യാലറിയാണ് മറ്റൊരു ആകർഷണം. ആനകളുടെ മ്യൂറൽ പെയിന്റിംഗാണ് മ്യൂസിയത്തിലേക്ക് എല്ലാവരെയും വരവേൽക്കുന്നത്. ഏഷ്യൻ, ആഫ്രിക്കൻ ആനകളുടെ ഉൽപ്പത്തിയും പരിണാമങ്ങളും മനുഷ്യരും പ്രകൃതിയുമായുള്ള ഇടപെഴകലും വിവരിക്കുന്ന ചിത്രങ്ങൾ മ്യൂസിയത്തിലെ രണ്ട് മുറികളിലായി ഭിത്തികളിൽ പ്രദർശിപ്പിച്ചിരിക്കുന്നു. കൊമ്പനാനയുടെ അസ്ഥികൂടമാണ് ശ്രദ്ധയാകാർഷിക്കുന്ന പ്രധാനയിനം. സമീപത്തായി ആനപ്പല്ല്, തലേയോട്ടി, കീഴ്ത്താടിയെല്ല്, മുട്ടുചിരട്ട, കൊമ്പുകൾ എന്നിവയുണ്ട്. ആനകളെ മെരുക്കാനും കുടുക്കാനും ഉപയോഗിക്കുന്ന മുളവടി, ഇടച്ചങ്ങല, അങ്കുശം, കത്തി, കൊമ്പ് ചുറ്റ്, ആനക്കെണി, മത്ത്, തോട്ടി, വലിയകോൽ തുടങ്ങയ ആയുധങ്ങളാണ് മറ്റൊരു വിഭാഗം. ആനകളുടെ ശീലങ്ങൾ, ഭക്ഷണം, സ്വഭാവം എന്നിവയുടെ വിവരണം കൂടി കണ്ട് ആനകളെക്കുറിച്ചുളള പൂർണ അറിവുകളുമായി മടങ്ങാം. ആനകൾ കേന്ദ്ര കഥാപാത്രങ്ങളായ സിനിമകളുടെയും പുസ്തകങ്ങളുടയും ചുവർചിത്രങ്ങൾ കണ്ട് ആർട്ട് ഗ്യാലറിയിലേക്ക് കയറാം. തടി, വൈക്കോൽ, ഗ്ളാസ്, കളിമണ്ണ് തുടങ്ങിയവ കൊണ്ട് നിർമിച്ച ആനകളുടെ ചെറുതും വലുതമായ നൂറോളം ശിൽപ്പങ്ങളും പെയിന്റിംഗുകളുമായി ആർട്ട് ഗ്യാലറി ആകർഷകമാണ്. ചിന്നം വിളിച്ചും ആർത്തലച്ചും നീങ്ങുന്ന ആനക്കൂട്ടങ്ങളും ഇമ്പമുള്ള കാഴ്ചകൾ. കോന്നിയിലും പരിസരങ്ങളിലും കേരള ലളിതകലാ അക്കാദമിയിലെ കലാകാരൻമാർ നടത്തിയ 'കരി' ചിത്ര രചനാ മത്സരങ്ങളിലെ ചിത്രങ്ങളും ഗ്യാലറിയിലെ സുന്ദര ദൃശ്യങ്ങളാണ്. ന്യൂഡൽഹിയിൽ വൈൽഡ് ലൈഫ് ട്രസ്റ്റ് ഒാഫ് ഇന്ത്യ സംഘടിപ്പിച്ച പ്രദർശനങ്ങളിലെ ശിൽപ്പങ്ങളുമുണ്ട്. കാട്ടിൽ നിന്ന് കിട്ടുന്ന ആനകളെ മെരുക്കിയെടുക്കാനുള്ള ആനക്കൊട്ടിൽ നവീകരിച്ചു. ജലസംഭരണിക്ക് സമീപമായി ഒരുക്കിയ െഎരാവതവും ആടിക്കളിക്കുന്ന വെള്ളാനയും ആകർഷകങ്ങളാണ്. ഇരുമ്പ് സാധനങ്ങൾ കൊണ്ട് നിർമിച്ച ആനയുടെ രൂപവമുണ്ട്. കുട്ടികൾക്ക് കളിക്കാനായി പ്രത്യേക പാർക്കും ഒരുക്കിയിട്ടുണ്ട്. 30 ഇനം പക്ഷി മൃഗങ്ങളുടെ ശബ്ദങ്ങളും ഡിജിറ്റൽ സംവിധാനത്തിലൂടെ കേൾപ്പിക്കും.