SÜNNİLƏR BAŞQA QURANA İNANIRLAR?

Bir çox sünni alim və xətibi belə bir iddia ilə çıxış edirlər ki, guya şiəliyə görə əlimizdə olan Quran həqiqi Quran deyil və guya şiələr başqa bir Qurana inanırlar. Guya şiələrə görə əsl Quranda bundan daha çox ayələr olub və onlar sonradan Qurandan xəlifələr tərəfindən çıxarılıb. Şiələrin guya Quranın təhrif edildiyinə inanmalarına dair “dəlil” olaraq şiə mənbələrindən bir sıra rəvayət gətirirlər. Lakin bu iddia tamamilə əsassızdır. Bu, şiəliyə qarşı atılan açıq bir böhtandır, iftiradır. Şiəlik – Allah rəsulunun qoyub getdiyi iki dəyərli əmanət – Quran və Əhli-beyt prinsipləri üzərində qurulub. Peyğəmbər və Əhli-beyt imamlarının cəmiyyətdə təbliğ etdiyi və insanlara öyrətdiyi Quran da məhz əlimizdə olan bu Qurandır. Hələ 10-cu əsrdə yaşamış məşhur şiə alimi Şeyx Səduq özünün “əl-İtiqadat” – “Etiqadlar” adlı əsərində “QURANA DAİR ETİQAD BABI” adlı fəsildə bunları yazır: Quranın Allah kəlamı, Onun vəhyi, nazil etdiyi, sözü və kitabı olduğuna etiqad bəsləyirik. “Onun nə önündən (nə öncədən), nə də arxasından (sonradan) heç bir batil ona yol tapa bilməz.ِ” (Fussilət surəsi, 42-ci ayə) “Şübhəsiz ki, Quranı Biz nazil etdik və əlbəttə, onu Biz qoruyacağıq!” (Hicr surəsi, ayə 9) “QURANIN HƏCMİ VƏ SAYI İLƏ BAĞLI ETİQAD BABI” fəslində yazır: Etiqadımız budur ki, Uca Allahın Peyğəmbərimizə nazil etdiyi Qurani-Kərim (hazırda) əlimizdə iki qilaf arasında olan kitabdır, bundan (həcm və ayə sayı etibarı ilə) çox deyil... Quranın sayının bundan çox olduğunu bizə nisbət verən şəxs YALANÇIDIR! Şahidi olduğumuz kimi, hələ 11 əsr əvvəl şiəlik etiqadı barəsində kitab yazmış məşhur şiə alimi birmənalı şəkildə sünnilərin sözügedən iddiasını rədd etmiş və şiələrin məhz əlimizdə olan bu Qurana inandıqlarını, bundan fərqli iddia ilə çıxış edənlərin isə YALANÇI olduğunu bildirmişdir. Maraqlı məqam budur ki, sünnilərin ən mötəbər kitablarında, o cümlədən Buxari və Muslimin “Səhih” əsərlərində nəql edilən bir sıra “səhih” hədislərdə bir sıra “Quran ayələri” yazılıb ki, onlar əlimizdə olan Quranda mövcud deyil. Həmin hədislərdə bildirilir ki, bu ayələr Allah rəsulu dünyasını dəyişənədək Quran ayəsi olaraq oxunub. Yəni bu hədislərdən açkar şəkildə görünür ki, sözügedən “ayələr” Allah rəsulu dövründə nəsx edilməmiş, onun ömrünün sonunadək Quran ayəsi olaraq oxunmuşdur. Lakin şahidi olduğumuz kimi, əlimizdə olan Quranda bu “ayələr” yoxdur. Bu hədislərin səhih olduğuna inandıqda belə çıxır ki, əhli-sünnə əlimizdə olan Qurana deyil, həmin “ayələrin” yer aldığı başqa bir Qurana inanır. Ərəblərin bir deyimi var – “Evin şüşədəndirsə, qonşunun evinə daş atma!” İndi şiələrə qarşı bu ittihamı irəli sürən əhli-sünnənin öz səhih hədis toplularına müraciət edib, əlimizdə olan Quranda mövcud olmayan bir neçə “ayə” ilə tanış olaq. RƏCM “AYƏSİ” əl-Buxari və Muslim rəvayət edirlər: “Ömər bin Xattab peyğəmbərin – salləllahu aleyhi va səlləm – minbəri üstündə oturarkən belə dedi: “Şübhəsiz ki, Allah Muhammədi – salləllahu aleyhi va səlləm – haqq ilə göndərib və Kitabı ona nazil edib. Allahın nazil etdikləri arasında rəcm ayəsi də var idi; onu birlikdə oxuduq, birlikdə anladıq və birlikdə öyrəndik. Allahın rəsulu rəcm etdi və biz də ondan sonra rəcm etdik. Uzun bir zaman keçdikdən sonra insanlardan kiminsə “Allaha and olsun ki, rəcm ayəsini Quranda tapa bilmirik” - deyərək Allahın nazil etdiyi bir fərzi tərk etməklə yolunu azacağından qorxuram. Dəlillə isbat olunduqda və ya (qadın) hamilə qaldıqda və ya etiraf edildikdə evli olduqları halda zina etmiş kişi və qadını rəcm etmək ALLAHIN KİTABINDA MÖVCUD OLAN BİR HAQQDIR.” (Ərəbcə: VƏ İNNƏR-RƏCMə Fİ KİTABİLLAHi HƏQQun!”) (əl-Buxari, hədis: 6830; Muslim, hədis: 1691) İbn macə öz SÜNƏN əsərində hətta sözügedən ayəni də yazır: وَالْشَيْخُ وَالشَّيْخَةُ إِذَا زَنَيَا فَارْجُمُوهُمَا الْبَتَّةَ نَكَالًا مِّنَ اللَّـهِ وَاللَّـهُ عَزِيزٌ حَكِيمٌ “Əgər yaşlı kişi və ya yaşlı qadın zina edərsə, əlbəttə, hər ikisini də daşqalaq edin. Bu, Allah tərəfindən bir cəzadır. Allah yenilməz qüvvət və hikmət sahibidir.” Belə bir ayə Quranda varmı? Şahidi olduğumuz kimi, yoxdur! BEŞ DƏFƏ ƏMİZDİRMƏ “AYƏSİ” Səhih Muslimdə Aişədən üç sənədlə, Qurandan olduğu iddia olunan üç hədis nəql edilir: "Quranda nazil olanlardan biri də məhrəm olmağa səbəb olan on dəfə məlum süd əmizdirmə ayəsi olmuşdur. Sonra bu, beş dəfə məlum süd əmizdirmə ilə nəsx olundu. Və Allah rəsulu (sallallahu aleyhi və səlləm) vəfat edəndə də bu, Qurandan oxunurdu." (Səhih Muslim, hədis:1452). Bu "ayə" də Quranda yoxdur! Sünnilərin səhih hədislərində deyilənlərə rəğmən, biz iddia etmirik ki, sünnilər başqa bir Qurana inanır. Tam əksinə, biz iddia edirik ki, sünnili-şiəli bütün müsəlmanların bir inandığı Quran var – məzhəbindən, təriqətindən asılı olmayaraq, bütün müsəlmanlar bir Qurana inanırlar. Sadəcə sünni qardaşlarımıza üz tutub deyirik ki, şiələrin hansı Qurana inandığı göz qabağındadır – şiələrin inandıqları Quran görürsünüz ki, elə sizin də inandığınız Qurandır. Bu, şiəliyin təməl prinsipidir və lütfən, şiəliyə qarşı belə ucuz iftira yaxmayın!