قبل ما تحكم على سلوك ابنك/بنتك.. شوف الأول إيه اللي بيحصل

طفلك بيصرخ، بيعند، بيضرب، بيكدب أو بيعمل سلوك مش فاهم/ة سببه… وأول رد فعل عندنا غالبًا بيكون إننا نتدخل بسرعة: نشرح، نعاقب، ننصح أو نحاول نوقف السلوك. بس قبل ما نتدخل، في خطوة مهمة جدًا ممكن تغيّر فهمنا للموقف كله: الملاحظة. في الفيديو ده هنتكلم عن الفرق بين إنك تشوف سلوك طفلك وبين إنك تلاحظه فعلًا، وإزاي نفصل بين الحقيقة اللي حصلت وبين تفسيرنا إحنا للي حصل. هنتعلم مع بعض نلاحظ: التصرف نفسه، السياق اللي حصل فيه، لغة جسم الطفل، وهل السلوك بيتكرر في أوقات أو مواقف معينة. وكمان هشارك معاكم أداة بسيطة جدًا: دفتر الملاحظة لمدة أسبوع. كل مرة يحصل سلوك محيّرك، سجّل/ي: 1. إيه اللي حصل بالظبط؟ 2. إمتى وفين؟ 3. إيه اللي حصل قبله؟ 4. إيه اللي حصل بعده؟ من غير حكم… ومن غير استعجال في التفسير. لأن في تراكيب بنحاول دايمًا نفتكر إن السلوك مش مجرد مشكلة محتاجة تتوقف؛ أحيانًا هو رسالة محتاجة تتفهم. ولو محتاج/ة مساعدة في فهم سلوك طفلك والاحتياج اللي ممكن يكون وراه، تقدر/ي تحجز/ي جلسة فردية معايا من خلال اللينك ده https://linktr.ee/tarakeebcounselling...