موئەیەد تەیب - کیڤی | Mu'eyed Teyib - Kîvî

Latînî: Xwezî ez Kûvîyek bame û ne Kîvî Ez Kîvî me Zarokek ê neh salî me Eve sê sale boyaxçî me Mala min.. Kolkek ê biçûk ji ax û bera Li taxê Gêjeber a Tecawiz e û Ji hemî xanîyên tecawiz pêheltir e Ji hemîya nizimtir û tarîtir e Rêka wê jî.. pesarek e Ji kêlîya şedayê riktir e Ez Kîvî me Boyaxçî me Li binarê Garey gundek yê hey Min ne dîtîye Lê ez xelkê wî gundî me Berê heşt sala Hêşta ez yê bi şîr bûm Hêşta ez gelek yê hîr bûm Babê min Rez ê me firot Pez ê me firot Mala me barkir e bajêrî Em bûyine bajêrî Ez kîvî me Boyaxçî me Babê min mirovekî rêncber û hêmin Pale bû Berî sê salan di dîwarekî da firî Û mir Dayika min par ez û dapîra min hêlayin Û şwî kir Dapîra min pîrejinek a pîr Xwedê herdem li bîr Ebdeka şukrî Roja wê nivêj û sala wê rojî Pirça wê spî Dilê wê spîtir Berî sê rojan Wê jî ez hêlam û ji vê fanîyê barkir Ez kîvî me Boyaxçî me Berî çar sala min xwîşkek hebû Ji tilya tirî naziktir Du sala ji min biçûktir Babê min navê wê kirbû "Kevî" Lê digutê "Heyva çarde şevî" Rojek ê nesax bû Roja paştir Nesaxtir Roja pêncê Bi rêka xestê ve mir Ji hîngê were Her şeveka ez asmanî dibînim Girêyek dikevîte gewrîya min Eger têr negirîm dê xendiqim Ji hîngê were Her careka ez heyva çarde şevî dibînim Aronkek min digirît Wek xencerê Cerg ê min dibirît Xwezî babê min ne mirba Xwezî dayika min.. Xwezî dapîra min Sê çar salên dî jî Xwe li min girtba Xwezî sorka xwîşka min ne girtba Xwezî ez çûbame medresê Û min resim zanîban Da reveka reveka qulingan Li asmanekê şîn çêkem Xwezî ez qulingê pêşîyê bame û Vê payîzê min ji vî warî barkirba Ez kîvî me Boyaxçî me Ne dibime nîgarkêş Ne qulingekî pêşkêş Te guh li min e bab! Ez nabime nojdar, ne endazyar Jiberku ez zarokekî êtîm û sêwî me Dê her liber pêlavên xelkî bim Û dê her mînim kîvîyê sebax Cîhana wî pêlav û boyax Li binarê Garey gundek yê hey Xwezî ez Balindeyekî asmanê wî bam Ez masîyeka rûbarê wî bam Ez kûvîyekî çol û beyarên wî bam Ne Kîvîyê boyaxçî bam.! :) ©RevendC