وصية أب لبنته (اه يا نقطة ضعفي يا أوزعة انتي ) | ابراهيم فرج

الشاعر ابراهيم فرج - ibrahim farag كلمات القصيدة : ازيك يا حبيبتي يا بنتي من قبل ما تيجي الدنيا و الناس هنا بيحبوكي .. وانا اكتر واحد محظوظ ف العالم علشان بس انا هبقي ابوكي .. واتمني اكون اب حقيقي الاب اللي يصاحبك وتصاحبيه اللي يحبك وتحبيه .. اللي مفيش حرف عليه هتخبيه وابقي انا سرك وقت اما يكون عندك اسرار وابقي البيت والباب والدار وتبصي ف عيني تحسي ان الدنيا نهار واكون السند اللي هتقفي وراه وتتحامي وانا يكفيني بجد من الدنيا اني اشوفك وانتي بتكبري قدامي . انا مش عارف ارتب حاجه بس انا مبسوط فرحان بيكي .. اني هربيكي تكبري توصلي وتحبي وهفرح بيكي وبوصيكي الي بنتي حبيبتي دلوقتي كبرتي وشوفتي الدنيا وهتشلي ان كنت معاكي ف خير من ربنا جدا وان كنت مشيت ابقي ادعيلي اولا ازيك من اول ما عيونك بصت ع الدنيا وشوفتيني ببوسك علي خدك .. ولحد ما تبقي كبيره وناضجه وعاقله وزينة الناس ومحدش قدك .. الدنيا يا بنتي عشان تمشي بتمشي ببركة ربنا فيها يعني ايمانك بالله اول حلقة ف ودنك هتحطيها اما بعد معرفش هتبقي شبه مين الظبط شبه انا ولا شبه ماما عصبية وخلقك ضيق زيا ولا شبه مامتك نكدية بتقلبها دراما بس عموما امك قبلي وقبلك برضه حبيتها الاول بس انتي بحبك اكتر سنه واهي دلوقتي هتزعل منا .. وتقلبها حوار بس حقيقي لو كنت بحبك ف حياتي قيراط امك بتحبك مية … اورثي منها حاجات ياما الطيبه والخوف والحنيه حبها ليا خوفها علي البيت واسمعي منها وحافظي عليها خليكي ايديها ورجلها وعنيها خدي رايها ف حياتك لبسك وصحابك وطلوعك ونزولك واسمعي منها عشان هتقول اللي مفيش انسان هيقولهولك وربنا يحميكي يا بنتي وخمسه ف عين كل اللي شافوكي وباكد يا حبيبتي عليكي بوصية سيدنا محمد امك امك امك ثم ابوكي غيرتي حياتي يابنتي الايه .. وانتي بتتفرجي ع الفيديو لو يعني وصلك هتكوني كبيرة ف ابقي قوليلي ومن غير ما تجاملي ايه رايك فيا وانا صغير دلوقتي اكيد شكلي اتغير وبقيت اوحش عجزت شوية وكبرت كتير .. وجريت ف الدنيا وخدتها مشاوير علشان خاطرك وجمالك يا عروسة اه يا نقطة ضعفي يا اوزعه انتي اول ما عرفت اني هكون اب صغرت النص وانا هصغر اكتر كل ماروح لعنيكي وابص يوم عن يوم رايحه وجايه تكبري ف عنيا تبقي عروسه من حتة لحمة علي ايديا شاطرة وواعيه وزينة صحابك وامينه وبتحبي الناس عايشة حياتك جد ف جد .. وف وقت مراهقة ولعب عيال تبقي تقيلة ومش منبهرة بحد وانا لو قضيت العمر اكتبلك ممكن اخلص كل كلام الناس ف انا عاوزك تاخدي كلامي تمشيه علي كل حياتك وساعتها يا بنتي تكوني " الانسان " عايشه الدنيا وهدفك هو ان اما تخشي قلوب الناس تفضلي جوه زي ما علمتك عارفه حدودك حافظة لقيمتك فاكرة كلامي ف كل المرات اللي انا جيت فيها وكلمتك والحارس الله يا نور عيني وف كل الخطوات الف سلامه دعواتي معاكي ودعوات امك يا علامه ف قلبي واه منها علامه يا نور عيني يا سكر ايامي يا قصايدي وكتباتي وكل كلامي يا جميله يا حلوة يا شبر ونص يا قمر اربعتاشر يا هدية قلبي يا عهد ربنا يديلك كل قلوب العالم وتلاقي الناس كلها بيحبوكي وباكد يا حبيبتي عليكي بوصية سيدنا محمد دينك امك امك امك ثم ابوكي