ማኅሌት ዘነሐሴ ኪዳነምህረት

ሥርዓተ ማኅሌት ዘነሐሴ ኪዳነ ምሕረት ነግሥ ስምዓኒ እግዚኦ ጸሎትየ፤ ሃሌ ሉያ : ሃሌ ሉያ ፤ ወይብጻሕ ቅድሜከ ገዓርየ፤ ሃሌ ሉያ : ሃሌ ሉያ ፤ ወኢትሚጢ ገጸከ እምነየ። በዕለተ ምንዳቤየ አጽምእ እዝነከ ኀበየ ፤ ሃሌ ሉያ(፪) አመ ዕለተ እጼውአከ ፍጡነ ስምዓኒ። ሃሌ ሉያ(፪) ለዓለም ወለዓለም ዓለም። ሃሌ ሉያ ዘውእቱ ብሂል ፤ ንወድሶ ለዘሀሎ እግዚአብሔር ልዑል። ስቡሕ ወውዱስ ዘሣረረ ኩሎ ዓለመ ፤ በአሐቲ ቃል። መልክአ ሥላሴ ሰላም ለኵልያቲክሙ እለ ዕሩያን በአካል፤ ዓለመክሙ ሥላሴ አመ ሐወፀ ለሣህል፤ እምኔክሙ አሐዱ እግዚአብሔር ቃል፤ ተፈጸመ ተስፋ አበው በማርያም ድንግል፤ ወበቀራንዮ ተተክለ መድኀኒት መስቀል፡፡ ዚቅ፦ ወታስተሥርዪ ኃጢአተ ሕዝብኪ ተበውሐ ለኪ ፨ እም አብ ወወልድ ወመንፈስ ቅዱስ፨ ከመ ትኵኒ ተንከተመ ለዉሉደ ሰብእ፨ ለሕይወት ዘለዓለም ፨ ለኪ ይደሉ ከመ ትኵኒ መድኀኒቶሙ ለመሐይምናን ሕዝብኪ ፨ ኦ መድኀኒተ ኵሉ ዓለም ወልድኪ ሣህሎ ይክፍለነ ሰአሊ ለነ ቅድስት፡፡ እምጌቴሴማኒ ፈለሰት እምጌቴሴማኒ ፈለሰት ኀበ ዘሉዓሌ መካን፤ ውስተ ቤተ መቅደስ ረባቢ ዘመሳክዊሁ ብርሃን፤ አንቀጸ አድኅኖ ማርያም ጽላተ ኪዳን፤ ኵሉ ይብልዋ በአኅብሮ ዘበዕብራይስጢ ልሳን፤ ዕፀ ጳጦስ ይእቲ እንተ በአማን ቅድስተ ቅዱሳን፤ እመቅድሀ ከርሣ ተቀድሐ አስራባተ ወይን፤ ወበውስቴታ ተሠርዓ ቊርባን፡፡ ዚቅ፦ ዕፀ ጳጦስ እንተ በአማን መዝገቡ ለቃል ፨ ዕፀ ጳጦስ እንተ በአማን አንቀጸ ብርሃን፨ ዕፀ ጳጦስ እንተ በአማን ጽጌ ደንጐላት ፨ ሐረገ ወይን ዘእምነገደ ይሁዳ፨ እንተ ሠረፀት ለሕይወት፡፡ መልክአ ኪዳነ ምሕረት ሰላም ለፍልሰተ ሥጋኪ ኀበ ሕንጻ ሕይወት ተሐደሰ፤ እምቅድመ ዝኒ ኀቤሁ ሥጋ ወልድኪ ፈለሰ፤ ቤዛዊተ ዓለም ማርያም አስተበቊዓኪ አንሰ፤ ትቤዝዊ በኪዳንኪ ዘዚአየ ነፍሰ፤ እስመ በሥራይኪ ለቊስልየ ቀባዕክኒ ፈውሰ፡፡ ዚቅ፦ ደብተራ ፍጽምት ዘጳውሊ፨ ወማኅደሩ በጽድቅ ዘገብራ ከሃሊ፨ ፈለሰት እምዘይበሊ ኀበ ኢይበሊ ፨ በመሰንቆሁ እንዘ የኃሊ፨ ዳዊት አቡሃ ዘወልዳ ወዓሊ። ወረብ፦ ደብተራ ፍጽምት ዘጳውሊ ፈለሰት እምዘይበሊ ኀበ ኢይበሊ፤ በመሰንቆሁ እንዘ የሐሊ ዳዊት አቡሃ ዘወልዳ ወዓሊ። መልክአ ማርያም ሰላም ሰላም ለዝክረ ስምኪ ሐዋዝ፤ እምነ ከልበኒ ወቊስጥ ወእምነ ሰንበልት ምዑዝ ማርያም ድንግል ለባሲተ ዐቢይ ትእዛዝ፤ ይስቅየኒ ለለጽባሑ ወይነ ፍቅርኪ አዚዝ፤ ከመ ይሰቅዮ ውኂዝ ለሠናይ አርዝ፡፡⁣⁠⁣ - ዚቅ፦ ሰላም ለኪ ማርያም እመ አምላክ፨ ወልድኪ ይጼውዓኪ፨ ውስተ ሕይወት ወመንግሥተ ክብር፡፡ --- መልክአ ማርያም ሰላም እስትንፋስኪ ዘመዐዛሁ ሕይወት፤ ከመ መዐዛ ዕፅ ኅሩይ ዘውስተ ገነት፤ ማርያም ድንግል ቤተ ቅድሳት፥ ጽንሕኒ ውስተ ሠናይ ወሰውርኒ እሞት፤ በአክናፍኪ ርግብየ ኅሪት፡፡ ዚቅ፦ ንዒ ኀቤየ እንቲአየ ሠናይት ርግብየ፨ መዓዛ አፉሃ ከመ ኮል፨ ወኵሉ ነገራ በሰላም፡፡ ወረብ፦ ንዒ ኀቤየ እንቲአየ ሠናይት ርግብየ ፤ መዓዛ አፉሃ ከመ ኮል መዓዛ አፉሃ ታንሶሱ፡፡ መልክአ ፍልሰታ ሰላም ለፍልሰተ ሥጋኪ ዘኢይቀብል ሞገሱ፤ ወዘኢይነጽፍ ባሕርየ ተውዳሱ፤ ማርያም ታዕካ ለእግዚአብሔር ጽርሐ መቅደሱ፤ ተበሃሉ በሰማያት እለ ኪያኪ አፍለሱ፤ ማርያምሰ እንተ በምድር ታንሶሱ ፡፡ ዚቅ፦ ማርያም ጽርሕ ንጽሕት ማኅደረ መለኮት ፨እኅቶሙ ለመላእክት ሰመያ ሰማያዊት ፨ እንተ በምድር ታንሶሱ፡፡ ወረብ፦ ማርያም ጽርሕ ንጽሕት ፤ ማኅደረ መለኮት ጽርሕ ንጽሕት። አንገርጋሪ ትርሢተ ወልድ መለኮት ወፍቅር ኀደረ ላዕሌሃ፤ ይቤላ ርግብየ ወይቤላ ሠናይትየ፥ ፀቃውዕ ይውኅዝ እምከናፍሪሃ ፡፡ ወረብ ዘአመላለስ፦ ትርሢተ ወልድ መለኮት ወፍቅር ኀደረ ላዕሌሃ፤ ይቤላ ርግብየ ወይቤላ ወይቤላ ሠዓለም፡፡ ዘቅንዋት ክብሮሙ ለቅዱሳን ሞገሶሙ ለጻድቃን ፤ መርሖሙ ለዕውራን ዝንቱ ውእቱ መስቀል ፤ እንስሳ ገዳምኒ አዕዋፈ ሰማይኒ ያንቀዓድዉ ኀቤከ ፤ አምላክ መስተመይጥ ፤ ያፀግብ ነፍሰ ነዳያን ያከርም በበዓመት ፤ ለዘበእንቲአነ ውስተ ማኅፀና ለማርያም ተሰወርከ ፤ ወበደመናትኒ ሰማየ ዘከለልከ ፤ ወኵሉ ቀሊል በኀቤከ።