احذر فخ الذهب فى قائمة المنقولات الزوجيه ليه محكمة الجنح مختلفه عن الاسره فى الاحكام بشأن الذهب

: "فخ الذهب في القايمة".. ليه محكمة الأسرة غير محكمة الجنح؟ موضوع الذهب فى قايمة المنقولات "يا جماعة، موضوع الذهب في القايمة ده مشكله ومعظم الناس فاهمه الوضع غلط ،. ليه محكمة الجنح ممكن تديك براءة في الذهب، وتروح محكمة الأسرة تلاقي نفسك ملزم انك تسلم الدهب او قيمته ؟ النهاردة هقولك الخلاصة اللي بتفصل بين 'الحبس' وبين 'الدفع'، عشان تعرف راسك من رجلك وأنت بتمضي على القايمه أو وأنت بتطلق." البراءة في الجنح مش معناها إنك مش هتدفع! "لازم نفرق بين حاجتين. محكمة الجنح بتدور على (جريمة التبديد). ومحكمة نقض الجنح قالت إن 'الذهب لصيق بالزوجة'، فغالباً القاضي في الجنح بعد ما تدفع ثمن العفش بيديك براءة بالرغم من انك مدفعتش الدهب لأن (الركن المادي) للجريمة مش موجود، والشك بيفسر لصالح المتهم. لكن خلي بالك.. البراءة دي مش معناها إن الذهب ده بقى ملكك أو إنك مش هتدفعه!" محكمة الأسرة ليها كلمة تانية خالص "هنا بقى 'المطب'. الزوجة لما بتروح ترفع دعوى (رد منقولات) أو (قيمة الذهب) قدام محكمة الأسرة، القاضي هنا بيتعامل مع 'حق مدني' مش 'جريمة'. محكمة الأسرة في أغلب أحكامها مش بتعترف بمبدأ إن الذهب مع الزوجة طالما هو مكتوب في القايمة وموقع عليه كـ 'أمانة' أو 'مهر'. بالنسبة لمحكمة الأسرة: 'المكتوب هو الاصل، وطالما مضيت إنك استلمت، يبقى لازم ترد، سواء رداً عينياً أو تدفع قيمته نقداً." الثغرة الحقيقية (هو الذهب "مهر" ولا "عارية"؟) "هنا دور المحامي الشاطر. لازم نثبت قدام محكمة الأسرة طبيعة الذهب ده إيه؟ هل هو جزء من المهر؟ ولا كان 'أمانة'؟ وإيه موقف الزوجة وهي خارجة من البيت؟ الحقيقة المرة إن محكمة الأسرة بتميل دائماً لحماية حقوق الزوجة المادية، ومبدأ 'الذهب لصيق بالزوجة' ده سلاح بنستخدمه عشان نحميك من الحبس، لكنه مش دايماً بيحميك من الدفع." 5نصيحة "لوجه الله" وقت كتابة القايمة "عشان تريح نفسك من الصداع ده، يا ريت الذهب يتكتب في القايمة بجملة واضحة: 'المصاغ الذهبي في حيازة الزوجة للاستعمال الشخصي'. الجملة دي بتغير مجرى القضية تماماً سواء في الجنح أو في الأسرة، وبتحميك من إنك تدفع ثمن حاجة هي أصلاً معاها." "القانون فيه تفاصيل دقيقة جداً، والفرق بين محكمة ومحكمة ممكن يقلب حياتك. لو عندك مشكلة في قايمة أو مطالبة بقيمة ذهب، متعتمدش على كلام النت، اعتمد على حد فاهم في 'دهاليز' المحاكم. ببعرف يفصل بين المسؤولية الجنائية والحق المدني. لو عندك سؤال في النقطة دي؟ سيبه في كومنت وهيتم الرد عليك."