انا مش زعلانه عشان ساكت - زعلك علي عيني وعلي قلبي | ابراهيم فرج وأميرة البيلي

الشاعر ابراهيم فرج - ibrahim farag كلمات القصيدة اميره انا مش زعلانة، عشان ساكت او مش مهتم انا كل الزعل اللي في قلبي إن انا خليته مكان الدم ووهبته الحب اللي احتاجه ووهبته مشاعر كان نفسي الاقيها في عينه وفي كلامه انا كل الزعل اللي ف قلبي إن انا ولا حاجة في ايامه قرب مني لغبط تفكيري واحوالي وترتيب الناس اللي معايا خلاني احس بأني خلاص عايشة عشانه وعرف ياخد قلبي مكانه واما أتمكن بدأ الإهمال واللا مبالاه بدأت أحزان ملهاش آخر قالي مسافر! مشغول مش فاضي اكون جنبك نطقت عينه " حبك ذنبك" مليت سامحيني من القصة انا حابب اعيش باقي حياتي من غير حكايات وزعل وكلام انا عايز اكون حر واكون لك صاحب مثلاً او اخ كمان انا اسف مش عارف اكمل وقفل تليفونه وقالي سلام مش هنكر اني حزنت وخوفت اعيش من غيره لكن كدبت مشاعر قلبي وسيبت ايديه انا قولت اللي يعوزني يجيني مش هجري عليه وعشان مختارش يكون ليا انا احب اعيش بكرامتي احسن من غير ما احزن ولا عشمي يضيع ومهانش عليا وهونت عليه ف انا هسمع عقلي المرة دي وهرتب يومي بدون صوته وهرتب ناسي بدون ما يكون واحد منهم وهفوق واضحك ، هخرج واحلم واعلق حلمي قصاد عيني علشان استاهل حد يسيب كل اللي وراه علشان يبعتلي " وحشتيني " علشان استاهل حد اكون ف عينيه الأولي وفي قلبه اكون اخر من حب استاهل حد يكون عارف معني " رجولة " وعارف معني الحب اللي بجد انا مش لعبة! ولا عمري هكون ساعة ما تعوز انا ست الناس ، انا فوق راسك مقبلش تفصل تفكيري وطباعي ويومي علي مقاسك! انا ليا كرامة وليا كيان انا ليا طباعي وشخصيتي وحريتي كمان واللي يعوزني! يتقبلني ، ويخاف علي زعلي وعلي حزني اللي يعوزني! ابقي انا اول واهم واعظم ما ف وقته ويسيب الكون كله عشاني! اللي يعوزني لازم قبل ما يغلط غلطة ميحطش نفسه إلا مكاني! علشان محزنش ف يوم منه اللي يحبني يفهم أنه مسؤل يهتم بتفاصيلي ويجيلي ف زحمة اشغاله بوردة وبهدية وبرسالة ويقولي بحبك يومياً ويدلعني اللي يحبني لازم يفهمني ويسمعني ويقرب مني بتفكيره وبتقديره ، وبأفعاله اللي يعوزني لازم يشاركني بتفاصيله وباشغاله ونشيل مع بعض عشان نوصل اللي يحبني لازم يفهم اني كبيرة ويقدر قيمتي ويتحاكي قدام الخلق بفخر كبير لازم في علاقة اي اتنين حب وتقدير اللي يحبني لازم يفهم اني كبيرة وفي وسط بنات الكون عينه تميز " اني اميرة " زعلك علي قلبي وعلي عيني .. بس اعمل ايه .. ضيعت العمر محاولات متغيرتيش .. انا كنت بجبلك قمر الليل قدام عينك ومبيكفيش .. بدل الشغلانه انا روحت اتنين لجل عيونك .. حطيت اللي ما بينا ف قلبي وحلفته لا يقسي ولا يخونك قد ما حبيتي انا اقسم بالله حبيت .. انا كنت المنديل وقت دموعك .. والباب المفتوح وقت رجوعك .. انا كنت ابوكي وامك واخواتك .. انا لو كان فيه حد يحلفني انا كنت ساعات بحلف بحياتك .. انتي اللي عنيكي مبتجيبش بعيد .. بتبصي لقعده ولخروجه وكلمه بقولهالك قبل مانام وانا عيني علي البيت والشقه ودنيتنا وعمرنا قدام ده الفرق ما بينك وما بيني .. اقسم بالله ان فراقك علي عيني .. بس انتي اختارتي ان انا منفعش اكون جنبك .. ف انا اسف فعلا اني بقولك حبك ذنبك .. سامحيني ف كل الفرص اللي اديتها .. وف كل الاحلام اللي انا قضيت من عمري سنين ببنيها وهديتها كده احسن ليا وليكي ومن غير ما نجرح ولا نرمي كلام .. وعشان كده كان لازم اقول ان احنا مننفعش لبعض .. سلام رتبي ايامك وبراحتك بس اعرفي والله ما هونتي ولا نسيتك .. بس انا مفهمتش غير بعد ما حبيتك .. من حقي اختار ويكونلي قرار او مستناش .. زي ما بيعتي انا برضه ببيع وببيع ببلاش .. حقك جالك كل المرات وانا حقي مجاش .. مبقاش جوايا مشاعر تاني اقدمها .. اللي تقرر تمشي بقرر اندمها .. والعين بالعين .. مش هقبل اكمل ولا احاول ولا حتي امشيلك متر كمان .. انا اصلي اتغيرت كتير مبقتش بحبك ولا زي زمان .. انا قلبي خلاص قرر يقسي .. قرر ينسي .. قررت انساكي وهتعافي .. مبقتش قريب بقي بينا مسافه هختار من بكره اللي تقدر وتصون وتحب .. اللي تشيلني وتفهم معني اني شاريها .. وهعلم قلبي يجبها ويموت فيها .. زي ما قدرت اتقدر .. وهحس بقيمتي .. وهشوفك بكره وهتجيلي وهتكوني ندمتي وساعتها هشوفك وهقولك لا .. وهتتأكدي ان انا علي حق .. ان انا كنت بدور علي حاجه تعيش وانتي ف عز السحله اللي انا فيها مقدرتيش انا همشي واسيبك خدي وقتك وسنينك وبراحتك .. بس اتغيري علشان اللي يحبك يفهم او حتي يحس ان انتي كبيره وخديها نصيحه .. ان انتي اذا فضلتي بنفس طباعك .. عمرك يوم ما هتتحبي ولا تبقي اميره