80 години „11 Октомври“: Елена Лука, Мартина и Виктор – приказна за љубовта што создава семејство

Семејството не го создаваат само крвните врски. Понекогаш, најсилните врски се оние што ги гради срцето, преку љубов, доверба, грижа и безусловна поддршка. По повод 80-годишниот јубилеј на Домот за деца без родители „11 Октомври“, споделуваме една искрена и длабоко емотивна приказна за човечноста, припадноста и љубовта која не познава граници. Елена Лука, основач, сопственик и генерален директор на ELENA LUKA GROUP, низ годините ја отвори својата прегратка и срце за Мартина и Виктор, прифаќајќи ги под своја закрила и станувајќи важен дел од нивните животи. Во ова искрено сведоштво, Елена Лука и Мартина зборуваат за нивниот однос, за заедничките искуства, предизвиците, убавите моменти и за посебната врска која со годините прерасна во вистинско семејство. Затоа што да бидеш родител не значи само да подариш живот, туку и да бидеш нечие прибежиште, поддршка и сигурност. Да веруваш во некого, да го охрабруваш и да бидеш покрај него додека ги остварува своите соништа. Осум децении постоење на Домот „11 Октомври“ се осум децении човечки судбини, животни приказни, надеж и нови почетоци. Нека оваа приказна биде потсетник дека најголемото богатство што можеме да го создадеме не се мери во материјални вредности, туку во љубовта што ја подаруваме и трагата што ја оставаме во нечии животи. 80 години „11 Октомври“ — 80 години приказни што заслужуваат да бидат раскажани.