Bonfire Night：一場失敗陰謀變成英國傳統節日

大家好，今日我想同大家介紹一下英國煙花節嘅起源。 英國煙花節通常喺每年 11月5日 舉行，英文叫做 Bonfire Night 或者 Guy Fawkes Night。當晚英國好多地方都會放煙花、燒bonfire，有啲大型啲仲會有live band表演。 呢個節日嘅起源，要追溯到 1605年。當時英格蘭國王係 James I，即係詹姆士一世。有一班天主教徒因為對當時政府嘅宗教政策不滿，所以策劃咗一個叫做 Gunpowder Plot，即係火藥陰謀 嘅事件。 佢哋計劃喺國王出席國會開幕嘅時候，用大量火藥炸毀英國國會大樓，希望殺死國王同埋政府重要人物。 其中最出名嘅人物就係 Guy Fawkes。佢負責看守藏喺國會大樓地庫入面嘅火藥。不過，喺計劃實行之前，政府收到一封匿名警告信，於是派人搜查國會大樓。 結果喺 11月5日凌晨，Guy Fawkes 被人發現同拘捕，而火藥亦被搜出，所以整個計劃最後失敗。 之後，英國人開始喺每年11月5日燃點篝火，紀念國王逃過呢次襲擊。慢慢，呢個傳統加入咗放煙花等活動，最後演變成今日嘅 Bonfire Night。 所以，而家我哋見到嘅煙花，其實唔單止係娛樂，亦同當年嘅火藥陰謀有關。 總括嚟講，英國煙花節已經有超過四百年歷史。由一場失敗嘅政治陰謀，慢慢演變成今日英國一個非常有特色嘅傳統活動。 大家喺街度見到廣告，有興趣都可以買飛參觀吓架，下次再見