ឧបនាយករដ្ឋមន្ត្រី ស សុខា ណែនាំបង្រួមនីតិវិធីពន្លឿនការបណ្ដេញចេញពីក្របខណ្ឌ ចំពោះមន្រ្តីនគរបាល...

ឧបនាយករដ្ឋមន្ត្រី ស សុខា ណែនាំបង្រួមនីតិវិធីពន្លឿនការបណ្ដេញចេញពីក្របខណ្ឌ ចំពោះមន្រ្តីនគរបាលដែលជាប់ពាក់ព័ន្ធគ្រឿងញៀន (Video inside) (ភ្នំពេញ)៖ អភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានណែនាំយ៉ាង​ឲ្យបង្រួមពេលវេលានៃនីតិវិធីក្នុងការបណ្ដេញចេញពីក្របខណ្ឌចំពោះមន្ត្រីរាជការសាធារណៈ ជាពិសេសកងកម្លាំងប្រដាប់អាវុធ ដែលត្រូវបានរកឃើញថាមានផ្ទុកសារធាតុញៀននៅក្នុងខ្លួន​ ដើម្បីរក្សាបាននូវកិត្តិយស សេចក្ដីថ្លៃថ្នូររបស់ស្ថាប័នរដ្ឋ។ អភិសន្តិបណ្ឌិត ស សុខា គូសបញ្ជាក់បែបនេះ ធ្វើឡើងក្នុង​ឱកាសលោកអញ្ជើញជាអធិបតីក្នុងពិធីដុតបំផ្លាញបារីក្លែងម៉ាក និងសម្ភារពាក់ព័ន្ធដែលសមត្ថកិច្ច បានបង្ក្រាបនៅក្នុងភូមិសាស្ត្រខេត្តតាកែវ។ ពិធីនេះប្រព្រឹត្តទៅនៅភូមិត្រពាំងជ្រៃ ឃុំត្រពាំងធំខាងត្បូង ស្រុកត្រាំកក់ ខេត្តតាកែវ ថ្ងៃទី១៧ ខែកញ្ញា ឆ្នាំ២០២៦ នេះ។ ​ ​ ក្នុងពិធីនេះ លោកអភិសន្តិបណ្ឌិត ស សុខា បានលើកឡើងពីករណីជាក់ស្ដែងមួយនាពេលថ្មីៗនេះ ដែលមានរងប៉ុស្តិ៍នគរបាលម្នាក់នៅក្រុងប៉ោយប៉ែត ខេត្តបន្ទាយមានជ័យ បានបើកបររថយន្តបុកគេ ហើយនៅពេលធ្វើតេស្តរកសារធាតុញៀន ក៏បានរកឃើញថាមានផ្ទុកសារធាតុញៀន​ ដែលរៀបចំនីតិវិធីស្នើសុំដាក់ទណ្ឌកម្ម ឬបណ្ដេញចេញពីក្របខណ្ឌ។ ​ លោកបានសង្កត់ធ្ងន់ថា នីតិវិធីទាំងនេះគួរតែត្រូវបានកាត់បន្ថយឲ្យបានលឿនបំផុត ដោយមិនចាំបាច់មាននីតិវិធីស្មុគស្មាញច្រើនឡើយ។ ការកាត់បន្ថយនីតិវិធីពីច្រើនថ្ងៃមកត្រឹមមួយថ្ងៃ គឺជារឿងចាំបាច់ដើម្បីធានាបាននូវភាពរហ័សរហួន និងប្រសិទ្ធភាពក្នុងការអនុវត្តវិធានការវិន័យ។ យោងតាមប្រសាសន៍របស់ឯកឧត្តម អភិសន្តិបណ្ឌិត ស សុខា មន្ត្រីពាក់ព័ន្ធទាំងអស់ដែលត្រូវបានរកឃើញថាមានសារធាតុញៀនក្នុងខ្លួន ត្រូវតែបណ្ដេញចេញពីក្របខណ្ឌភ្លាមៗ។ ​លោកអភិសន្តិបណ្ឌិត​ បានបញ្ជាក់ថា បញ្ហានៃការប្រើប្រាស់គ្រឿងញៀនក្នុងចំណោមមន្ត្រីរាជការ គឺជាបញ្ហាធ្ងន់ធ្ងរដែលមិនអាចអត់ឱនបានឡើយ។ ការណែនាំនេះឆ្លុះបញ្ចាំងពីការប្តេជ្ញាចិត្តរបស់រាជរដ្ឋាភិបាលក្នុងការប្រយុទ្ធប្រឆាំងគ្រឿងញៀន និងការកសាងរដ្ឋបាលសាធារណៈមួយប្រកបដោយភាពស្អាតស្អំ គ្មានគ្រឿងញៀន ដើម្បីបម្រើប្រជាពលរដ្ឋប្រកបដោយទំនុកចិត្ត និងប្រសិទ្ធភាព៕