የኅዳር ሚካኤል ዚቅ

ለጒርዔክሙ፦ አመ ይፈጥራ እግዚአብሔር ለምድር ኢዜነዎ ለሰማይ ወኢተማከረ ምስለ መላእክቲሁ ወተከለ ሠለስተ ዕፀ ሕይወት በዲበ ምድር። ነግሥ፦ ጐሥዐ ልብየ ጥበበ ወልቡና፤ ለውዳሴከ ጥዑመ ዜና፤ ቅዱስ ሚካኤል ልማድከ ግብረ ትሕትና፤ አንተኑ ዘመራሕኮሙ ፍና፤ ወአንተኑ ለእስራኤል ዘአውረድከ መና። ዚቅ፦ አዝነመ ሎሙ መና ይብልዑ ፀዓዳ ከመ በረድ ወርእየቱ ከመ ተቅዳ ኅብስተ እምሰማይ ወሀቦሙ አውኃዘ ሎሙ ማየ ሕይወት ዘትረ ኰኵሕ ፈልፈለ ነቅዕ ዘኢይነጽፍ ኅብስተ እምሰማይ ወሀቦሙ። ዘመንክር ጣዕሙ፦ ንዒ ርግብየ ወንዒ ሠናይትየ ቃልኪ አዳም ይጥዕመኒ እምአስካለ ወይን አርአዮ ለሙሴ ግብራ ለደብተራ ወተናገሮ በዓምደ ደመና እሞሙ ይእቲ ለሰማዕት ወእኅቶሙ ለመላእክት አርአዮ ለሙሴ ግብራ ለደብተራ ወተናገሮ በዓምደ ደመና። ለዝክረ ስምከ፦ ውእቱ ሚካኤል መልአከ ኃይል ልዑል ውእቱ ልዑለ መንበር ይስአል ለነ ረዳኤ ይኩነነ አመ ምንዳቤነ ሰፊሖ ክነፊሁ ይጸልል ዲቤነ። ለልሳንከ፦ ረሰዮ እግዚኡ ለውእቱ ሚካኤል እምኵሎሙ መላእክት ይትለዐል መንበሩ ሥዩም በኀበ እግዚኡ ምእመን። ለኅንብርትከ፦ ባሕረ ግርምተ ገብረ ዓረፍተ ወበውስቴታ አርአየ ፍኖተ በእደ መልአኩ አቀቦሙ በገዳም ለዳም ለሕዝቡ አርብዓ ዓመተ ወሴሰዮሙ መና ኅብስተ ኪነ ጥበቡ ዘአልቦ መስፈርተ። አምኃ ሰላም፦ ተወከፍ ጸሎተነ ውስተ ኑኃ ሰማይ ወስእለተነ ከመ መዓዛ ሠናይ ተወከፍ ጸሎተነ ውስተ ኑኃ ሰማይ።