ពិធីដង្ហែ និងវេរអង្គកឋិនទានសាមគ្គី នៅពុទ្ធមណ្ឌលវិបស្សនាធុរៈ នៃព្រះរាជាណាចក្រកម្ពុជា

សូមអនុមោទនា ពិធីដង្ហែ និងវេរអង្គកឋិនទានសាមគ្គី ប្រគេនព្រះសង្ឃក្រាលគ្រង ពុទ្ធមណ្ឌលវិបស្សនាធុរៈ នៃព្រះរាជាណាចក្រកម្ពុជា   បុណ្យកឋិនទានសាមគ្គី បានប្រារព្ធឡើងតាមកាលបរិច្ឆេទគ្រោងទុក ដើម្បីដង្ហែអង្គកឋិនទានវេរប្រគេនព្រះសង្ឃក្រាលគ្រង តាមពុទ្ធវិន័យ។ ក្នុងពិធីនេះ មានវត្តមានអញ្ជើញចូលរួមពី៖ ឯកឧត្តមបណ្ឌិត ពេជ សោភ័ន និងលោកជំទាវ ម៉ុក ប៉ូប៉ុនរិទ្ធ អគ្គមហាឧបាសិកា សុខ អ៉ីម ព្រមទាំងអគ្គមហាឧបាសក អគ្គមហាឧបាសិកា មហាឧបាសក មហាឧបាសិកា ឯកឧត្តម អ្នកឧញ៉ា លោកឧកញ៉ា លោកជំទាវ លោក លោកស្រី សីលវន្ត សីលវតី ឧបាសក ឧបាសិកា និងពុទ្ធបរិស័ទជិតឆ្ងាយ ដោយសទ្ធាជ្រះថ្លា និងសាមគ្គីភាព។ បុណ្យកឋិនទាន ជាបុណ្យដ៏វិសេសវិសាលក្នុងព្រះពុទ្ធសាសនា ដែលមានរយៈពេលកំណត់ត្រឹម ២៩ថ្ងៃ បន្ទាប់ពីព្រះសង្ឃចេញព្រះវស្សា ហើយវត្តមួយអាចទទួលអង្គកឋិនបានតែមួយដងប៉ុណ្ណោះក្នុងមួយឆ្នាំ។ ការប្រារព្ធកឋិនត្រូវប្រកាន់ខ្ជាប់តាមពុទ្ធវិន័យ ដោយមានលក្ខណៈពិសេស ៥ យ៉ាងគឺ៖ ១-ប្លែកដោយកាល មានរយៈពេលកំណត់ត្រឹម ២៩ថ្ងៃ ២-ប្លែកដោយវត្ថុ ប្រើស្បង់ ចីវរ ឬសង្ឃាដី ជាអង្គកឋិន ៣-ប្លែកដោយអំពើ ត្រូវរៀបចំ និងប្រព្រឹត្តតាមពុទ្ធវិន័យ ៤-ប្លែកដោយអ្នកទទួល ត្រូវជាព្រះភិក្ខុដែលបានគង់ចាំវស្សាគ្រប់បីខែត្រឹមត្រូវ ៥-ប្លែកដោយអានិសង្ស ព្រះសង្ឃដែលទទួលក្រាលគ្រងកឋិន ទទួលបានអានិសង្ស ៥ប្រការ ក្នុងរយៈពេលកំណត់តាមព្រះវិន័យ។ ចំពោះពុទ្ធបរិស័ទដែលមានសទ្ធាចូលរួមធ្វើកឋិនទាន ក៏ជាការប្រកបនូវកុសលដ៏ប្រសើរ ដែលតាមគម្ពីរពុទ្ធសាសនាបានរៀបរាប់ពីអានិសង្ស៥ប្រការ៖ រូបស្អាត សម្បុរល្អ ទ្រង់ទ្រាយល្អ បានជាស្តេចចក្រពត្តិ និងបើបព្វជ្ជា នឹងបានជាឯហិភិក្ខុ-ភិក្ខុនី សម្រេចអរហត្តមគ្គ អរហត្តផល។   ពិធីបុណ្យកឋិនទានសាមគ្គី មិនត្រឹមតែជាការប្រគេនចីវរដល់ព្រះសង្ឃប៉ុណ្ណោះទេ ប៉ុន្តែថែមទាំងជាការបង្ហាញពីសទ្ធាជ្រះថ្លា សាមគ្គីភាព ការរួបរួមគ្នាក្នុងការធ្វើបុណ្យកុសល និងការថែរក្សាប្រពៃណីព្រះពុទ្ធសាសនាឱ្យបានគង់វង្សតទៅ សូមឱ្យម្ចាស់ទាន និងពុទ្ធបរិស័ទ ទទួលបាននូវបុណ្យកុសល សេចក្តីសុខ សេចក្តីចម្រើន សុខភាពល្អ និងជួបប្រទះតែនឹងពុទ្ធពរទាំងឡាយ ៤ ប្រការគឺ៖ អាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ។ ━━━━━━━━━━ ថ្ងៃអាទិត្យ ៦រោច ខែអស្សុជ ឆ្នាំមមី អដ្ឋស័ក ព.ស.២៥៧០​ ត្រូវនឹងថ្ងៃទី១ ខែវិច្ឆិកា ឆ្នាំ២០២៦