Дастан Иманғазиев: "Қала көркі сапалы жобалаудан басталады"

Қала келбеті сапалы жобалау мен сауатты құрылысқа тікелей байланысты. Әрбір тұрғын үй, ғимарат немесе өндірістік нысан - кәсіби инженерлер мен жобалаушылардың тың идеясы мен жауапты еңбегінің жемісі. Осындай мамандардың бірі - жобалау және құрылыс саласында көп жылдан бері табысты еңбек етіп келе жатқан кәсіпкер Дастан Иманғазиев. Ол "White Pearl" құрылыс-жобалау компаниясы мен "Das Buildings" ЖШС директоры, I санатты жобалау, құрылыс-монтаждау, инженерлік ізденістер және экологиялық жобалау бағыттарында жұмыс жүргізетін білікті маман. Оның жетекшілігімен Ақтау қаласындағы көптеген тұрғын үй кешендері мен түрлі мақсаттағы ғимараттардың жобалары әзірленіп, жүзеге асқан. Тұрақты айдарымызда Дастан Иманғазиевпен құрылыс саласының бүгінгі тынысы, заманға сай жобалау үрдісі, кәсіпкерлік жолы, сондай-ақ өңірдегі құрылыс саласының даму қарқыны жөнінде әңгімелестік.