Жанбаба саябағының ашылуы Қызылшекара ауылы

Райымбек ауданының 90 жылдық мерейтойы аясында Қызылшекара ауылында Жанбаба ата ұрпақтарының ел игілігіне тарту еткен жаңа саябағы ашылды. Туған жерге деген перзенттік парызды ұлықтаған игі бастама ауыл тұрғындары үшін қуанышты жаңалыққа айналды. Саябақтың сәнін келтіріп, ұлттық құндылықтарды айшықтайтын арнайы стелланың ашылу рәсімі салтанатты түрде өтті. Стелланы Райымбек ауданының әкімі Дастан Құдабаев, аудандық қоғамдық кеңестің төрағасы Айыпжан Қаптағаев, Алматы облысы және Райымбек ауданының құрметті азаматы, ардагерлер кеңесінің төрағасы Бекболат Бірбаев, ҚР Мәдениет қайраткері, Райымбек, Кеген және Жамбыл аудандарының құрметті азаматы Тәңірберген Қасымберкебаев және ауыл ақсақалы Семетай Абдихалықов ашты. Саябақтың бой көтеріп, ел игілігіне берілуіне үлкен үлес қосқан азаматтардың бірі – Нурбеков Жолдыбек. Ол осы игі істің ұйымдастырылуы мен жүзеге асуына басынан бастап соңына дейін белсене атсалысып, қажетті жұмыстарды ұйымдастырып, тиісті дүниелерді іздестіріп, саябақтың толыққанды қалыптасуына өз еңбегін арнады. Жолдыбек ағаның жауапкершілігі, табандылығы және туған жерге деген жанашырлығы осы жобаның жүзеге асуына айрықша үлес қосты.