თავდაცვის ძალების დაზვერვის ქვედანაყოფებმა ერთკვირიანი საველე შეკრება დაასრულეს

საქართველოს თავდაცვის ძალების დაზვერვის ქვედანაყოფების სიტუაციური საველე შეკრება დასრულდა. შეკრების დასკვნით საჩვენებელ სწავლებას საქართველოს თავდაცვის ძალების მეთაური, გენერალ-ლეიტენანტი გიორგი მათიაშვილი, თავდაცვის ძალების სხვა ხელმძღვანელ პირებთან ერთად, დაესწრო. თავდაცვის ძალების მეთაური სწავლების მიმდინარეობას გაეცნო და სამხედრო მოსამსახურეებს გაესაუბრა.  პირადმა შემადგენლობამ დავალებები სიმულაციური სასწავლო სცენარის შესაბამისად შეასრულა. სადაზვერვო ჯგუფებს ისეთი ამოცანების შესრულება დაევალათ, როგორიცაა: ინფილტრაცია და რეიდი, რაიონისა და მარშრუტის რეკოგნოსცირება, ობიექტის დაზვერვა, ექსფილტრაცია და წყლის დაბრკოლებების გადალახვა. სწავლების დასასრულს, ბრიფინგზე სამხედროების მიერ ამოცანების შესრულების ხარისხი დადებითად შეფასდა. ერთკვირიანი სიტუაციური საველე შეკრება გენერალური შტაბის J-2 დაზვერვის დეპარტამენტის ხელმძღვანელობით ჩატარდა. სწავლებაში აღმოსავლეთისა და დასავლეთის სარდლობების, ეროვნული გვარდიის, სპეციალური ოპერაციის სარდლობის, ავიაციისა და საჰაერო თავდაცვის სარდლობის, ასევე სამხედრო დაზვერვის დეპარტამენტის სამხედრო მოსამსახურეებმა მიიღეს მონაწილეობა.  სწავლება მიზნად ისახავდა დაზვერვის ქვედანაყოფების საბრძოლო მომზადების დონის შემოწმებასა და საბრძოლო მზადყოფნის დონის ამაღლებას, სტანდარტული ოპერაციული პროცედურების დახვეწასა და ტაქტიკური უნარ-ჩვევების შეფასებას.