Manju Warrier's mother Girija Madhavan's talents; Mohiniyattam & Kathakali debut performance soon

അമ്മയുടെ പിറന്നാൾ ദിനത്തിൽ നടി മഞ്ജു വാര്യരുടെ വൈറലായ കുറിപ്പ് ഇങ്ങനെയായിരുന്നു: 'എന്റെ സൂപ്പർസ്റ്റാറിന് ജന്മദിനാശംസകൾ. അമ്മ എപ്പോഴും അദ്ഭുതപ്പെടുത്തുന്നു, ജീവിതത്തിൽ പുതിയത് എന്തെങ്കിലും തുടങ്ങാൻ ഇനിയും വൈകിയിട്ടില്ലെന്ന് തെളിയിക്കുന്നു.' ഇതാ ഇപ്പോൾ അമ്മ ഗിരിജാ മാധവൻ, മോഹിനിയാട്ടം പഠിക്കുന്നതിനിടെ കഥകളിയും അഭ്യസിച്ചു. ചൊവ്വാഴ്ച പെരുവനം ക്ഷേത്രത്തിൽ അരങ്ങേറ്റമാണ്. രണ്ടു വർഷം മുമ്പാണ് ഊരകം എൻ.എസ്.എസ് കരയോഗത്തിന്റെ സർഗശ്രീലകം പരിശീലന ക്ളാസിൽ 70 വയസോളമുള്ളവരുടെ കഥകളി അവതരണം കണ്ടത്. തിരുവുളളക്കാവിൽ മോഹിനിയാട്ടം പഠിക്കുകയായിരുന്നു അന്ന്. 'നമുക്കും കഥകളി പഠിച്ചാലോ' കൂട്ടുകാരിയും റിട്ട. ബാങ്ക് ഉദ്യോഗസ്ഥയുമായ ശൈലജ കുമാർ ചോദിച്ചപ്പോൾ ആദ്യം ഒഴിഞ്ഞുമാറിയെങ്കിലും പിന്നീട് ഗിരിജ സമ്മതിച്ചു. എഴുപതിലേക്ക് അധികദൂരമില്ലെങ്കിലും യോഗയും മോഹിനിയാട്ടവുമെല്ലാം അഭ്യസിച്ചതുകൊണ്ട് മെയ് വഴക്കവുമുണ്ടായിരുന്നു. ഏതായാലും രണ്ടുപേരും കലാനിലയം ഗോപിയുടെ ശിഷ്യരായി. ആദ്യം കാൽവേദനയും ശരീര വേദനയുമെല്ലാമുണ്ടായിരുന്നു. പക്ഷേ, പഠിക്കണമെന്ന ആഗ്രഹത്തിനു മുന്നിൽ വേദന മറന്നു. അതിനിടെയായിരുന്നു കൊവിഡിന്റെ 'കത്തിവേഷം'. പിന്നെ ഓൺലൈനിലായി പഠനം. ഒന്നരവർഷം കൊണ്ട് പഠനം ഏതാണ്ട് പൂർത്തിയാക്കി. കൊച്ചിൻ ദേവസ്വം ബോർഡിന് കീഴിലുള്ള പെരുവനം മഹാദേവക്ഷേത്രത്തിലെ ശിവരാത്രി ആഘോഷത്തിന്റെ ഭാഗമായി വൈകിട്ട് ഏഴിന് കല്ല്യാണസൗഗന്ധികം കഥകളിയിൽ പാഞ്ചാലിയായാണ് ഗിരിജ മാധവൻ അരങ്ങേറുന്നത്. ലവണാസുര വധം കഥയിൽ ശൈലജകുമാറും ഒപ്പം അരങ്ങേറ്റത്തിനുണ്ട്