♂ אלקי אל תדינני Eloqay Al Tedineni v.1

אֱלֹקַי אַל תְּדִינֵנִי כְּמַעֲלִי, וְאַל תָּמֹד אֱלֵי חֵקִי כְּפָעֳלִי: בְּחֶמְלָֽתְךָֽ גְּמֹל עָלַי וְאֶחְיֶה, וְאַל נָא אֵל תְּשַׁלֵּם לִי גְּמוּלִי: גְּאוֹן לִבִּי לְךָ אַשְׁפִּיל וְאֶקְרַע, בְּמַכְאוֹבִי לְבָבִי לֹא מְעִילִי: דְּוֵה לֵבָב אֲנִי נִצָּב וְנֶעְצָב, עֲלֵי פִשְׁעִי וְרֹב רִשְׁעִי וְסִכְלִי: הֲלוּם יָגוֹן בְּלִי יַיִן כְּאַיִן, אֲשׁוּרִי מִנְּתִיבָךְ מָט וְרַגְלִי: וּמָה אֶעֱנֶה וְאָן אֶפְנֶה לְעֶזְרָה, בְּיוֹם מִשְׁפָּט לְמִי אָנוּס וּמִי לִי: זְדוֹנוֹתַי לְמוּל פָּנַי וְעֵינַי, כְּלִמָּתִי לְעֻמָּתִי וְאֶצְלִי: חֲטָאַי לוּ יְרִיחוּן בָּם שְׁכֵנַי, אֲזַי בָּֽרְחוּ וְרָחֲקוּ מִגְּבוּלִי: טְמֵא לֵבָב אֲשֶׁר סוֹבָב וְשׁוֹבָב, לְבָבִי בִי עֲלֵי כָל־חֵטְא פְּלִילִי: יְדַעְתִּים בַּעֲלוֹתָם עַל לְבָבִי, רְאִיתִים עַל יְמִינִי גַּם שְׂמֹאלִי: כְּקַשׁ נִדָּף אֲנִי נִרְדָּף וְנֶהְדָּף, וְלֹא נִכְנַע וְלֹא נִמְנַע עָמָלִי: לְךָ עֵינַי בְּתַחֲנוּנַי ה', בְּהֵאָנְחִי שְׁמַע שִׂיחִי וְקוֹלִי: מְנַת חֶלְקִי וְצוּר חֶזְקִי וְחֶשְׁקִי, וּמִבְטָחִי וְגַם כֹּחִי וְחֵילִי: נְחֵנִי נָא בְּאֹֽרַח הַנְּכוֹנָה, לְפָנֶֽיךָ וְהָכֵן אֶת־שְׁבִילִי: סְלַח חוֹבִי וְיַשֵּׁר אֶת־לְבָבִי, אֲשֶׁר תּוֹעֶה כְּמוֹ רוֹעֶה אֱוִילִי: עֲנֵה נַאֲקִי דְּלָתֶֽיךָ בְּדָפְקִי, רְאֵה צוּרִי רְפָא צִירִי וְחִילִי: פְּדֵנִי מֵעֲוֹנִי צוּר גְּאוֹנִי, אֱיָלוּתִי בְּגָלוּתִי וְחֶשְׁלִי: צֳרִי עָצְבִּי מְשׂוֹשׂ לִבִּי בְּקִרְבִּי, וְשִׂמְחָתִי בְּאַנְחָתִי וְאֶבְלִי: קְדוֹרַנִּית לְךָ אֵלֵךְ שְׁחוֹחַ, בְּלִי כֹחַ סְלִיחָתָךְ בְּשַׁאֲלִי: רְאֵה כִּי זִכְרְךָֽ יָהּ תּוֹךְ לְבָבִי, וּבִזְמָמִי בְּמוֹ יוֹמִי וְלֵילִי: שְׁעֵנִי־נָא רְצֵנִי אֵל אֱמוּנָה, וְתִיטַב לָךְ תְּשׁוּרַת מַהֲלָלִי: תְּנַהֲלֵנִי יְמֵי מִדַּת צְבָאִי, וְתִרְעֵנִי יְמֵי חֶלְדִּי וְחֶדְלִי: חֲמֹל עֲלַי וְכַפֵּר מַעֲלָלַי, וְשׁוּר שִׁירִי כְּשִׁיר מוּשִׁי וּמַחְלִי: וְעֵת תָּבִיא יְצוּרֶֽיךָ בְּמִשְׁפָּט, אֱלֹקַי אַל תְּדִינֵנִי כְּמַעֲלִי: רְעֵה בְּשִׁבְטְךָֽ, עַם מְקַוִּים פִּדְיוֹם, כִּי לְמִשְׁפָּטְךָ עָֽמְדוּ הַיּוֹם: Musique réalisée avec l'IA de SUNO. Music made with SUNO's AI.