Farizon សម្រេចចាប់ដៃគូជាមួយ ក្រុមហ៊ុនកាពីតូល ជំរុញការធ្វើទំនើបកម្មដឹកជញ្ជូនអ្នកដំណើរដោយរថយន្ត...

Farizon សម្រេចចាប់ដៃគូជាមួយ ក្រុមហ៊ុនកាពីតូល ជំរុញការធ្វើទំនើបកម្មដឹកជញ្ជូនអ្នកដំណើរដោយរថយន្តអគ្គិសនី (ភ្នំពេញ)៖ ក្រុមហ៊ុន កាពីតូល (CAPITOL TOURS and Transport) ដែលផ្តល់សេវាកម្មដឹកជញ្ជូនអ្នកដំណើរ និងផ្ញើអីវ៉ាន់ បានសម្រេចចិត្តជ្រើសរើស Farizon ជាដៃគូយុទ្ធសាស្ត្រ ដើម្បីធ្វើទំនើបកម្មសេវាកម្មដឹកជញ្ជូន ដោយងាកមកប្រើប្រាស់រថយន្តអគ្គិសនីសម្រាប់ការដឹកអ្នកដំណើររបស់ខ្លួន។ ការសម្រេចចិត្តនេះ បន្ទាប់ពីកាពីតូល បានប្រើតេស្តសាកល្បង និងមើលឃើញពីគុណភាព ក៏ដូចជាសមត្ថភាពដ៏លេចធ្លោរបស់រថយន្ត Farizon ហើយឈានដល់ការចុះហត្ថលេខាលើអនុស្សរណៈយោគយល់គ្នា ស្តីកិច្ចសហប្រតិបត្តិការប្រើប្រាស់រថយន្តអគ្គិសនីជាផ្លូវការ។ ពិធីចុះហត្ថលេខារវាងក្រុមហ៊ុន Farizon Cambodia និងក្រុមហ៊ុន កាពីតូល (CAPITOL TOURS and Transport) បានប្រព្រឹត្តទៅយ៉ាងអធិកអធមនៅឯអគារតាំងបង្ហាញរបស់ក្រុមហ៊ុន Farizon នៅថ្ងៃទី៣០ ខែតុលា ឆ្នាំ២០២៦ ដោយមានការចូលរួមពីថ្នាក់ដឹកនាំសំខាន់ៗនៃក្រុមហ៊ុនទាំងពីរ។ លោក បាវ វឌ្ឍនៈ អគ្គនាយកក្រុមហ៊ុន Farizon Cambodia បានគូសបញ្ជាក់ពីសារៈសំខាន់នៃកិច្ចសហប្រតិបត្តិការនេះ ដែលនឹងជួយជំរុញការប្រើប្រាស់យានយន្តអគ្គិសនីក្នុងវិស័យដឹកជញ្ជូនអ្នកដំណើរនៅកម្ពុជា។ លោកបានបន្ថែមថា រថយន្ត Farizon កំពុងត្រូវបានប្រើប្រាស់នៅក្នុងប្រទេសជាច្រើនជុំវិញពិភពលោក ខណៈនៅកម្ពុជា ក្រុមហ៊ុនបាននាំចូលដំបូងមកក្នុងខែកក្កដា ឆ្នាំ២០២៥ ដោយទទួលបានការគាំទ្រយ៉ាងខ្លាំងពីអតិថិជន។ លោក លើកទឹកចិត្តម្ចាស់អាជីវកម្មទាំងអស់ឱ្យងាកមកប្រើប្រាស់រថយន្តអគ្គិសនីព្រោះការប្រើប្រាស់រថយន្តអគ្គិសនីផ្តល់អត្ថប្រយោជន៍ជាច្រើន រួមមានការសន្សំសំចៃខ្ពស់រហូតដល់ ៧០% បើធៀបជាមួយការប្រើប្រាស់ប្រេងឥន្ធនៈ កាត់បន្ថយសំឡេងរំខាន និងផ្តល់ផាសុកភាពក្នុងការបើកបរ។ លើសពីនេះ ការប្រើប្រាស់យានយន្តអគ្គិសនីក៏ចូលរួមចំណែកក្នុងការការពារបរិស្ថាន និងគាំទ្រដល់គោលនយោបាយរបស់រាជរដ្ឋាភិបាលកម្ពុជាក្នុងការផលិតថាមពលអគ្គិសនីក្នុងស្រុក។ លោក ផាន់ សុភាព អគ្គនាយកក្រុមហ៊ុន កាពីតូល បានគូសបញ្ជាក់ថា ការប្រើប្រាស់រថយន្តអគ្គិសនី Farizon មិនត្រឹមតែជាការធ្វើទំនើបកម្មរបស់ក្រុមហ៊ុន CAPITOL ប៉ុណ្ណោះទេ ថែមទាំងជួយកាត់បន្ថយការចំណាយលើប្រេងឥន្ធនៈ និងផ្តល់តម្លៃសេវាកម្មទាបជាងរថយន្តប្រើប្រេងធម្មតា។ បើតាម លោក ផាន់ សុភាព ជំហានដំបូងនេះ ក្រុមហ៊ុន CAPITOL បានបញ្ជាទិញរថយន្ត Farizon ចំនួន ៧ គ្រឿង ហើយគ្រោងនឹងបង្កើនដល់ ២០ គ្រឿងក្នុងឆ្នាំនេះ និងឈានទៅបង្កើនការបញ្ជាទិញរហូតដល់ ៥០ គ្រឿងនៅឆ្នាំ២០២៧។ លោកបានសង្កត់ធ្ងន់ថា«គុណភាពរថយន្ត Farizon គឺខ្លាំងមែនទែន ហើយភ្ញៀវដែលបានជិះសុទ្ធតែសរសើរ»។ ដំបូងឡើយ ខ្ញុំមិនសូវចាប់អារម្មណ៍នឹង Farizon ទេ ប៉ុន្តែក្រោយពីបានពិនិត្យ និងសាកល្បងបើកបររថយន្តទៅកាន់ខេត្តសៀមរាប ដោយមិនចាំបាច់សាកថ្មតាមផ្លូវ យើងក៏មានការជឿជាក់យ៉ាងខ្លាំង។ ចំណុចនេះគឺជាតម្រូវការចម្បងរបស់ក្រុមហ៊ុន និងភ្ញៀវទេសចរទូទាំងប្រទេស ដែលចង់បានការធ្វើដំណើរដោយរលូន មិនរំខានដោយការឈប់សាកថ្ម»៕