Holy Ordination | ഡീക്കൻ ഏലിയാസ് വർഗീസ് വെള്ളാരംകാലായിൽ

ആകമാന സുറിയാനി ഓർത്തഡോക്സ് സഭയുടെ പരമാദ്ധ്യക്ഷൻ പരിശുദ്ധ മോറാൻ മോർ ഇഗ്നാത്തിയോസ് അഫ്രേം ദ്വിതീയൻ പാത്രിയർക്കീസ് ബാവയുടെ അനുഗ്രഹീത കല്പനയാൽ യുകെ ഭദ്രാസനത്തിന്റെ പാത്രിയാർക്കൽ വികാരി അഭിവന്ദ്യ മോർ ഒസ്താത്തിയോസ് ഐസക് മെത്രാപ്പോലീത്തയുടെ തൃക്കരങ്ങളാൽ യു.കെ ഭദ്രാസനത്തിനു വേണ്ടി ഡീക്കൻ ഏലിയാസ് വർഗീസ് വെള്ളാരംകാലായിൽ കശീശ്ശ സ്ഥാനത്തേക്ക് ഉയർത്തപ്പെടുന്നു. പൗരസ്ത്യ സുവിശേഷ സമാജത്തിന്റെ കീഴിലുള്ള പെരുവ കാരിക്കോട് സെന്റ്‌ ജോർജ്ജ് ഇമ്മാനുവെൽ സിറിയക് ഓർത്തഡോക്സ്‌ പള്ളിയിൽ വച്ച് ആഗസ്റ്റ് 12 രാവിലെ 7.30 ന് നടക്കുന്ന വിശുദ്ധ കുർബ്ബാനാനന്തരം പട്ടംകൊട ശുശ്രുഷകൾ നടക്കും. യുകെ മേഖലയിലെ എഡിൻബോറോ സെന്റ് മേരീസ് യാക്കോബായ സുറിയാനി ഓർത്തഡോക്സ്‌ പള്ളി ഇടവക അംഗവും, MJSSA യുകെ യുടെ സെൻട്രൽ കമ്മറ്റി അംഗവും കൂടിയായ ഡീക്കൻ ഏലിയാസ് വർഗീസ് സ്കോട്ലൻഡിൽ ഹയർസെക്കൻഡറി സ്‌കൂൾ അധ്യാപകനാണ്. പാലാ സെന്റ് തോമസ് കോളജിലെ കമ്യൂണിക്കേറ്റീവ് ഇംഗ്ലിഷ് വിഭാഗത്തിൽ ലക്ചറർ ആയിരുന്ന ഇദ്ദേഹം മൂവാറ്റുപുഴ നിർമല കോളേജിൽ വിസിറ്റിങ് ലക്ചററായും പ്രവർത്തിച്ചിട്ടുണ്ട്. കാരിക്കോട് വെള്ളാരംകാലായിൽ പരേതനായ വർഗീസിന്റെയും അന്നമ്മയുടെയും മകനായ ഡീക്കൻ ഏലിയാസ് 2008 ലാണ് സ്കോട്ലൻഡിൽ എത്തിയത്. 2015 മുതൽ ബെൽ ബാക്സ്റ്റർ സ്കൂ‌ളിൽ അധ്യാപകനാണ്. കേംബ്രിജിലെ ഇൻസ്റ്റിറ്റ്യൂട്ട് ഓഫ് ഓർത്തഡോക്സ് ക്രിസ്ത്യൻ സ്റ്റഡീസിൽ നിന്ന് ഓർത്തഡോക്സ് തിയോളജിയിൽ പോസ്റ്റ് ഗ്രാജ്വേറ്റ് ഡിപ്ലോമയും ഡണ്ഡീ യൂണിവേഴ്സിറ്റിയിൽ നിന്ന് സെക്കൻഡറി എജ്യൂക്കേഷനിൽ പ്രഫഷനൽ ഗ്രാജുവേറ്റ് ഡിപ്ലോമയും കരസ്ഥമാക്കി. സ്വീഡനിലെ സ്റ്റോക്ക്ഹോം സിറിയക് സ്കൂളിൽ സിറിയക് ഇന്റർമീഡിയറ്റ് കോഴ്സും യൂണിവേഴ്സിറ്റി ഓഫ് വെയിൽസിൽ വേദശാസ്ത്ര ബിരുദാനന്തര ബിരുദ പഠനവും പൂർത്തിയാക്കി വരികയാണ്. പട്ടംകൊട ശുശ്രുഷകൾ യാക്കോബായ സുറിയാനി ഓർത്തഡോക്സ് സഭയുടെ ഔദ്യോഗിക മാധ്യമ വിഭാഗമായ ജെ.എസ്.സി ന്യൂസിലൂടെ തൽസമയ സംപ്രേഷണം ചെയ്യും.