Luka 15:11-32 || Fapa Tlan Bo Tehkhin Thu || The Parable Of The Prodigal Son

Luka 15:11-32 A sawi zel a, mi pakhat hian fapa pahnih a nei a; a naupang zawk chuan a pa hnenah, 'Ka pa, ka ro chanai chu min pe rawh' a ti a. Tichuan a sum chu an hnenah a sem ta a. Tin, ni rei lotêah a fapa naupang zawk chuan a chanai zawng zawng chu a la khawm vek a, ram dang hla takah a kal ta a. Chutah chuan nuam chênin a sum chu a khawhral ta hiau hiauva. A sum neih a chên ral zawh chuan, chu ramah chuan țam nasa tak a lo tla a, ei tûr a lo tlachham ta a. Tichuan, chumi rama cheng mi pakhat a bêl ta a, a ni chuan lo lamah vawk rual enkawl tûrin a tir a. Tin, vawk chaw te chu ei tak a nâp a, tuman ei tur an pe si lo. Nimahsela, a inhre chhuak ta a; tichuan, a rilruin ka pa chhiahhlawhte, chaw ei sen loh nei an tam teh lul nên, kei lah chu hetah ril tâmin ka thi mai dâwn si a, ka tho vang a, ka pa hnênah ka kal ang a, a hnênah, 'Ka pa, vâna mi chungah leh i chungah ka lo ti sual ta a ni e, i fapaa vuah tlâk pawh ka ni ta lo, i hnêna inhlawhfa pakhat angin mi siam ve mai rawh ka ti ang' a ti a. Tichuan a thova, a pa hnênah a kal ta a. Ani chu hla taka a la awm laiin a pa chuan a lo hmu a, a khawngaih êm êm a, a tlân a, a va kuah chawt a, a fâwp ngawih ngawih a. Kawrfual țha ber kha han la ula, hâktîr rawh u; a kutah zung bun te, a kephahah pheikhawkte bun tîr rawh u. Sebâwng tuai châwm thau kha han kai ula, talh rawh u, hlim takin ruai i țheh ang u. A fapa upa zâwk chu lovah a feh a, a lo haw a, in a thlen dâwn chuan thil tum rî leh lâm thâwm chu a hre ta a. Chhiahhlawh pakhat a ko va, "Chu, eng nge ni ta?" a ti a. A ni chuan, "I nau a lo hâwng a, dam taka a hmuh leh avangin i pa in bâwng tuai châwm thâu kha a talh a ni" a ti a. A ni chu a thinur a, in ah chuan a lût duh ta lo va, a pa chu a va chhuak a, a rawn thlêm a, a pa chu a chhang a, "Ngai rawh, kum khaw hei leh chen i rawng ka lo bâwl ve tawh a, i thu âwih loh lai pawh ka nei ngai lo va, ka țhiante nena intih hlim ve nân, kêlte tak ngial pawh mi la pe ngai hek lo. Mahse, hei i fapa, nawhchizuarte laka i sum chênral vektu hi a lo hâw chauhva, sebâwng tuai châwm thâu i lo talh leh nghâl a" tiin a chhâng a. Tin, a ni chuan a chhâng a, "Ka fapa, ka hnêna awm reng i ni a, ka neih zawng zawng hi i ta alawm, hê i nau thi tawh kha a lo nung leh ta a ni a, a bo tawh kha kan hmu leh ta a nih hi; chuvangin hlim tak leh lâwm taka awm tûr kan ni zâwk a sin" a ti a.