☘️ Yonca sahələrində fitonomusa qarşı fitosanitar mübarizə tədbirləri gücləndirilir

🌿 Kənd Təsərrüfatı Nazirliyi yanında Aqrar Xidmətlər Agentliyinin (AXA) Bitki Mühafizəsi və Fumiqasiya (zərərsizləşdirmə) Mərkəzinin mütəxəssisləri tərəfindən respublikanın bütün bölgələrində yonca sahələrinin əsas zərərvericisi olan fitonomusa qarşı fitosanitar müşahidələr və mübarizə tədbirləri davam etdirilir. Növbəti belə mübarizə tədbirlərindən biri Biləsuvar rayonunda mövcud olan yonca sahələrində təşkil edilib. 🔍 Agentliyin mütəxəssisləri tərəfindən aparılan monitorinqlər zamanı rayonun bir sıra kəndlərini əhatə edən əkin sahələrində zərərvericinin yayılma səviyyəsi qiymətləndirilib. Nəticələrə əsasən, bəzi ərazilərdə iqtisadi zərər həddinin aşdığı müəyyən edildiyindən operativ şəkildə mübarizə tədbirləri görülüb. ⚠️ Qeyd edək ki, fitonomus əsasən yarpaq və cavan zoğlarla qidalanaraq məhsuldarlığı əhəmiyyətli dərəcədə azaldır. Vaxtında aparılan mübarizə tədbirləri isə həm məhsul itkisini minimuma endirir, həm də növbəti vegetasiya dövründə zərərvericinin yayılmasının qarşısını alır. 🤝 Agentlik tərəfindən bölgələrdə fitosanitar tədbirlər davam etdirilir və fermerlərə mütəmadi olaraq metodiki dəstək göstərilir. Fermerlərə tövsiyə olunur ki, sahələrində zərərverici müşahidə etdikdə dərhal yerli bitki mühafizəsi mütəxəssislərinə müraciət etsinlər.