Մենք ենք մեր գյուղերը Կոթի 1

Մայիսի 2-ին, ժամը 08:00-ին Հանրապետության Հրապարակից մի խումբ կամավորներ ուղևորվեցին դեպի սահմանամերձ Կոթի գյուղ: Երկար Ճանապարհից հետո, գյուղում՝ Սուրբ Աստվածածին եկեղեցու մոտ, սպասում էին կոթեցիները՝ գյուղապետի գլխավորությամբ: Ի դեպ արշավականները կրում էին "Մենք ենք մեր գյուղերը" նախագծի անվանական շքանշանները: Մոմավառությունից հետո հյուրերը տեղաորվեցին հյուրնկալողների տներում, որտեղ էլ հնարավորություն ունեցան մասնակցել գյուղական կենցաղին բնորոշ աշխատանքների: Երեկոյան եկեղեցու հարակից տարածքում հյուրերը և գյուղացիները համախմբվեցին խարույկի շուրջ, կիսվեցին իրենց պատմություններով՝ վերածելով երեկոն հայրենասիրական և մշակութային տոնի: 2-րդ օրը՝ տնական նախաճաշից հետո, հյուրերը կոթեցիների ուղեկցությամբ մեկնեցին սարեր և սահմանին մոտ գտնվող տեսարժան վայրեր, որտեղ հեռվից երևում էր ադրբեջանի տարածքում գտնվող Սուրբ Սարգիս եկեղեցին: Հետո կազմակերպվեց փոքրիկ տոնավաճառ, որտեղ կոթեցիները հնարավորություն ունեցան ներկայացնել և վաճառել իրենց մթերքն ու ձեռքի աշխատանքները: Գնումները ավարտելուց հետո բարեկամները փոխանակվեցին տվյալներով և հրաժաշտ տվեցին միմյանց, կրկին հանդիպելու մեծ ակնկալիքով: