Muhimman Abubuwan Da Suka Faru A Shariar Sheikh Lawan Triumph Da Kungiyoyin Darikun Sufaye 24-9-2026

A yau Alhamis 24/09/2026, aka cigaba da sauraron shari'ar da wasu ƙungiyoyin ɗariƙun Sufaye suka shigar a kan Sheikh Lawan Triumph, a Babbar Kotun Shari'ar Musulunci da ke Ƙofar Kudu, ƙarƙashin jagorancin Alƙali Ibrahim Sarki Yola. Wannan shi ne zama na biyu a cikin jerin ranakun da aka zauna sauraron wannan shari'a. Idan za ku iya tunawa, a zaman farko da aka yi ranar 17/09/2026, an tashi ne bayan lauyoyin Sheikh Lawan Triumph sun nemi a ba su lokaci domin su yi nazarin ƙarar da aka shigar, su gabatar da martaninsu a rubuce, tare da sukar da suke da ita akan hurumin kotun na sauraron ƙarar. Kotu ta ba su daga ranar zuwa Litinin 21/09/2026 su gabatar da martaninsu, su kuma lauyoyin masu ƙara su mayar da nasu martanin zuwa yau Alhamis 24/09/2026. A zaman yau, ɓangarorin biyu sun cika wannan umarni, an gabatar da takardunsu kuma kotu ta liƙa su a kundin shari'ar. Sai dai kuma zaman ya sake ɗaukar wata sabuwar alkibla, inda aka samu doguwar muhawara akan yadda ya kamata kotu ta fara tafiyar da abubuwan da suke gabanta. Ga muhimman abubuwan da suka faru: 1. Takaddama Akan Preliminary Objection: Bayan Alƙali ya tabbatar da cewa ɓangarorin biyu sun gabatar da takardunsu, ya bayyana cewa zai fara waiwayar lauyoyin wanda ake ƙara ne akan Preliminary Objection (PO) da suka gabatar, domin jin ko suna da wani ƙarin bayani bisa doka bayan martanin da masu ƙara suka yi musu. Ya ce idan sun kammala, sai ya waiwayi lauyoyin masu ƙara akan Substantive Application ɗinsu, idan su ma suna da wani ƙarin bayani bisa doka sai su gabatar. Alƙalin ya kuma bayyana cewa yana da wasu tambayoyi da ya tanada domin yi wa lauyoyin masu ƙara, saboda tabbatar da adalci. Amma kafin a kai ga wannan, sai lauyan Sheikh Lawan Triumph ya gabatar da wata fahimta ta daban. Ya ce a fahimtarsa, idan aka shigar da ƙara kai tsaye irin wannan, sannan wanda ake ƙara ya ƙalubalanceta ta hanyar Preliminary Objection, to ya kamata kotu ta fara sauraron PO ɗin, ta yanke hukunci akansa, kafin ta shiga maganar Substantive Application ɗin masu ƙara. Ya ce: da ace an shigar da ƙarar ne ta hanyar Originating Summons, da maganar za ta iya zama daban. Amma tun da ba haka aka shigar da wannan ƙarar ba, yana ganin ya kamata kotu ta fara tabbatar da cewa tana da hurumin sauraron shari'ar. A nan ya kafa hujja da hukuncin kotun daukaka akan shari’ar Sani vs Okene Traditional Council and Others (2018), sannan ya roƙi kotu ta duba wannan batu ta ga ko tana da hurumi, ta faɗi matsayarta kafin a cigaba. 2. Lauyan masu ƙara ya yi suka: Da Alƙali ya waiwayi lauyan masu ƙara ya tambaye shi ko ya yarda da wannan fahimta, sai ya ce maganar da lauyan wanda ake ƙara ya yi kamar "riga malam masallaci" ce. Ya ce kamata ya yi lauyan ya jira ya ga abin da kotu za ta yi tukunna, domin kotu ba ta ma kai ƙarshen bayaninta ba. Lauyan ya ce fahimtar da ake son tilasta wa kotu ta ɗauka ba ta da alaƙa da wannan kotun, domin kotu ba ta ce za ta yi watsi da Preliminary Objection ɗin ba, ko kuma ba za ta saurare shi ba. Ya ƙara da cewa tun a zaman da ya gabata ma, a fahimtarsu, kotu ta yi wasu sassauci ga ɓangaren wanda ake ƙara, har ta yanke wasu matsayai, amma su ba su yi korafi ba. Ya dogara da sashe na 107 na ACJL 2019, sakin layi na 4, yana mai cewa wannan sashe ya bai wa kotu cikakkiyar damar karɓar korafi. Ya ce sun kawo wannan sashe ne tun farko domin gujewa abin da ya kira dabarun 'yan shari'a. Lauyan ya sake waiwayar batun da suka taso da shi tun zaman farko na cewa akwai bukatar wanda ake ƙara ya kasance a gaban kotu, yana mai cewa suna son a guji samun wata gaɓa da za ta mayar da shari'ar zuwa takaddamar technicalities da ɗaukaka ƙara maimakon shiga ainahin abin da ake ƙara akai. Ya ce manyan kotuna sun riga sun yi watsi da fifita irin waɗannan dabaru akan ainahin shari'a. Dangane da maganar cewa ba za a saurari Preliminary Objection da Substantive Application a lokaci guda ba, lauyan ya ce kotuna sun yi bayanai sosai akan wannan batu, ciki har da fassarar sashe na 258 na Kundin Tsarin Mulkin Najeriya. Ya kuma dogara da shari'ar Tukur Abduljabbar Hamisu vs WAEC (2024). Bayan haka ya ambaci Zenith Bank vs Praumour Nigeria Ltd, yana mai cewa Kotun Ɗaukaka Ƙara ta tabbatar da yiwuwar sauraron asalin korafi tare da batun hurumin kotu a lokaci guda. Daga nan ya roƙi kotu, kada a buɗe ƙofar da za ta kawo dabarun technicalities. Ya ce kotu ta kalli takardun da ɓangarorin biyu suka gabatar, ta kalli maslahar shari'ar, sannan ta yi abin da ya dace. Sannan ya bayyana wa Kotun cewa wannan shari'a tana da miliyoyin mutane da suke da interest a kanta. Muna rokon Allah Ya taimaki Gaskiya da Masu Gaskiya, Kuma Allah Ya Rusa Karya Da Makaryata. Awaisu Al’arabee Fagge Kano State.